તમારૂં આગમન નથી હોતું..!
તમારૂં આગમન નથી હોતું..!
હવે નજરો મળે છે, ને મિલન નથી હોતું;
ફક્ત શબ્દો ગોઠવાય છે ખાલી, કથન નથી હોતું!!
ભરી છે ખોબાઓમાં અંજલી આંસુઓથી છલોછલ;
બે બુંદ નજરે ચડે અેવું કોઈ સ્વજન નથી હોતું!!
ચડી જાઉં હસતે મોઢે આજ પણ શૂળી પર પણ,
કોઇ ઇલજામ પણ ન દે, એ સહન નથી હોતું!!
વીંઝી દે કોરડાઓ તું ચાહે એમ નગ્ન બદન પર;
લાગણીઓને ઠોકરે ચઢાવે આમ, એવું દમન નથી હોતું!!
ફક્ત કાંટાઓ રહ્યા છે ડાળીએ ડાળીએ અહીં ઉપવનમાં;
આવું કોઈ જિંદગીમાં ખીલેલું ચમન નથી હોતું!!
કાંઈક તો પગરવનો અવાજ આવવો જોઈએ તમારો;
હવાની રુખ બદલાયે એવું તમારું આગમન નથી હોતું!!
ન જોશો આમ શબ્દોને, દર્દ ટપકતું લાગશે તમને;
ચાહવાનું અમ જેવું તમને કોઈ વ્યસન નથી હોતું!!
હાથ જોડવાની કોઈ જરુરત આજ પણ ઉભી ન હો મને;
પાંપણો ઢાળવા જેવું હ્યદયથી તમને નમન નથી હોતું!!
શું આગ બૂઝાશે આ હ્યદયની શ્મશાનના લાકડાઓમાં?
રાખ બની જાવાથી પણ લાગણીઓનું શમન નથી હોતું!!