ଉତ୍ତର ନ ପାଇଥିବା ପ୍ରଶ୍ନ

ଝିଅ ଜନମ ମୁ କାହିଁକି ପାଇଲି?

ଗରିବ ଘରେ କାହିଁକି ଜନମ ହେଲି ?

ଝିଅ ବୋଲି ମୋତେ ପଢାଇଲେ ନାହିଁ,

ପଢି କଣ କରିବ ଭାବନ୍ତି ସେଥିପାଇଁ |

ଏକୁଟିଆ ଯିବାକୁ ଭୟ ଲାଗୁଥାଏ ,

ସମସ୍ତଙ୍କ ଆଖି ମୋ ଉପରେ ଥାଏ |

ବାପାଙ୍କ ବଂଶ ଆଗେ ବଢାଇବା ପାଇଁ ,

ଅବଦାନ ମୋର ନାହିଁ ସେଥିପାଇଁ |

ପକ୍ଷୀ ପରି ଉଡିବା ମୋ ଭାଗ୍ୟରେ ନାହିଁ ,

କୌଣସି କଥାରେ ସ୍ଵାଧୀନତା ନାହିଁ |

ବୟସ ବଢିବାରୁ ବାହା ହୋଇଗଲି,

ଅଜଣା ପରିବାରରେ ପ୍ରବେଶ ହୋଇଲି |

ଯାନୀ ଯୌତୁକ ଦେଇ ପାରିଲେନି,

ସେଥିପାଇଁ ଗଞ୍ଜଣ ସହିଲି ମୁ ଜାଣି|

ବାପାଙ୍କ ଇଜ୍ଜତ ରଖିବାକୁ ଯାଇ ,

ଶାଶୁଘରେ ରହିଲି ମଉନ ହୋଇ |

 

ସନ୍ଧ୍ଯା ସକାଳେ ପୂଜା କଲାବେଳେ , 

କାହିଁକି ମୁ କାହିଁକି ମୁ ପଚାରି ଚାଲେ |

ବାପଙ୍କୁ ପଚାରେ ସଂସାରକୁ କାହିଁକି ଆଣିଲ?

ଅଲୋଡା ଅଖୋଜା କରି ଦୂରେଇ ଦେଲ |

ପଢାଲେଖା ନ ହେବାରୁ ଯୋଗ୍ୟ ବର ପାଇଲିନି ,

ଗରିବୀ ମୋ ପିଛା ଏ ଜୀବନରେ ଛାଡିଲାନି |

ମୋ ଆଗରେ ଭାଇକୁ ସବୁ ସୁବିଧା ଦେଲ ,

ପଇସା ନ ଥିଲେ ବି ତାକୁ ପାଠ ପଢାଇଲ |

 

ସବୁ ସ୍ନେହମମତା ତାକୁ ହିଁ ଦେଲ ,

ଲାଗୁଥିଲା ମୋତେ ମାଗିକି ଆଣିଥିଲ |

ଏମିତି ଜୀବନ ତ ମୁ ମାଗି ନ ଥିଲି ,

କି ଦୋଷ ପାଇଁ ଏ ସବୁ ଭୋଗିଲି ?

ପ୍ରଭୁଙ୍କ ଠାରୁ କିଛି ଉତ୍ତର ପାଇଲିନି ,

ବାପମା ମଧ୍ୟ ରହିଲେ ମଉନ ହୋଇ |