ଉଠାଣି ରାସ୍ତା

ଜୋର୍ ଲଗାଇକି ଚଢ଼ିବାକୁ ହେବ

ପାହାଡ଼ ଉଠାଣି ରାସ୍ତା

ନୁହେଁ ସମତଳ ସଳଖ ସୁନ୍ଦର

ଲୋଡଇ ସାବଧାନତା ।

ବିପଦରେ ପୂର୍ଣ୍ଣ ଖାଲ ଖମା ଘାଟି

ଥାଏ ପଡ଼ିଯିବା ଭୟ

ହେଉ ପଥଚାରୀ ବାହନ ଚାଳକ

ମନ କରନ୍ତି ଏକାଗ୍ର ।

ସ୍ମରନ୍ତି ଈଶ୍ୱର ବନଦେବୀ ଦୁର୍ଗା

ତାରିଣୀ ବାଟ ମଙ୍ଗଳା

ଅରପନ୍ତି ପୂଜା ଶୁଭ ନାରିକେଳ

ପିଇ ପାଦୁକା ବା ପଣା ।

ଦୃଢ଼ ଇଚ୍ଛାଶକ୍ତି ଶୃଙ୍ଖଳା ବଳରେ

ଚଢାଣି ହୁଏ ସମ୍ଭବ

ଦୁର୍ଘଟଣା ଘଟେ ଅସତର୍କ ହେଲେ

ଜୀବନ ସଙ୍କଟାପନ୍ନ ।

ଦୁଃସମୟ କାଳ ରୋଗ ମହାମାରୀ

ଦୁର୍ବିପାକ ଅନାଟନ

ଲୋକଙ୍କ ମନରେ କୋକୁଆର ଭୟ

ଶୁଭେ ଖାଲି ହା ହା କାର ।

କଠିନ ସମୟେ ଲୋଡ଼ା ମନୋବଳ

ଦୁଃସାହସ ସାବଧାନୀ

ଧୈର୍ଯ୍ୟ ହରାଇଲେ ଯୁଦ୍ଧ ବା ବିପଦ

ପାରେ ନାହିଁ କିଏ ଜିଣି ।

ଆସନ୍ତୁ ସଭିଏଁ ହୋଇବା ସତର୍କ

ଧରାଧରି ହୋଇ ହାତ

ଉଚ୍ଚ ଉଠାଣିକୁ ଯିବା ଅତିକ୍ରମି

ଟାଳିବା ମହାବିପଦ ।

  ------