ଉତ୍କଳ ଜନନୀ ସନ୍ତାନ ଆମେରେ

ଉତ୍କଳ ଜନନୀ ସନ୍ତାନ ଆମେରେ

ତିଳେ ନାହିଁ ଭେଦଭାବ ।

ଏକତାର ମନ୍ତ୍ରେ ଏକତାର ବଳେ

ରଖିବା ତାର ଗୌରବ ।

କଳାର କ୍ଷେତ୍ରରେ ଆମେରେ ନିପୁଣ

ସାହିତ୍ୟରେ ଆଗ ଧାଡ଼ି ।

ପୂରୁବ ପୁରୁଷ ଯାହା କହିଛନ୍ତି

ଯିବାନାହିଁ ପଥ ହୁଡ଼ି ।

ଧରମାର ଡାକ ଏବେବି ଶୁଭୁଛି

ଚନ୍ଦ୍ରଭାଗା ନଈ ବୁକେ ।

ସ୍ବାଧୀନତା ଆମ ଜନ୍ମ ଅଧିକାର

ବାଜି ରାଉତ ମୋ ଡାକେ ।

ଦୀନ ଦରିଦ୍ରଙ୍କ ମୁଖେ ଅନ୍ନ ଦେଇ

ସାଥି କରି ଆଗେଇବା ।

ମଧୁବାବୁଙ୍କର ସ୍ବପ୍ନର ଉତ୍କଳ

ତା ନାମ ଉଚ୍ଚେ ରଖିବା ।

ଦେଶ ଜାତି ସେବା ପରମ କର୍ତ୍ତବ୍ୟ

ବାଣୀ ଗୋପବନ୍ଧୁଙ୍କର ।

ମାତୃଭୂମି ମାତୃ ଭାଷାର ସୁରକ୍ଷା

ଲେଖିଗଲେ ଗଙ୍ଗାଧର ।

ଉତ୍କଳ ଦିବସ ସାର୍ଥକ ହୋଇବ

ଉତ୍କଳ ନିବାସୀ ଯେବେ ।

ବିଶ୍ୱ ଦରବାରେ ଉତ୍କଳର ନାମ

ଶୀର୍ଷରେ ରଖି ପାରିବେ ।