ଉଜୁଡା ମନର ଗୀତ

ସପନ ଜଳିଛି ଶବଟିଏ ହୋଇ

ପଡ଼ିଛି ପାଉଁଶ ଖାଲି

ପାଉଁଶ ଗଦାର ପାଖେ ବସି ଦେଖ

ଉଦାସ ପଡ଼ୁଛି ଉଛୁଳି ।

ଉଜୁଡ଼ା ମନର ଗୀତ ଶୁଭୁଅଛି

ଚାଷୀର ଉଜୁଡା କ୍ଷେତେ

ନିଃଶବ୍ଦ କାନ୍ଦଣା ଛାତି ଧରା କୋହେ

ହିଡ ମୁଣ୍ଡେ ମଥା ପିଟେ ।

ଫସଲ କିଆରୀ ଶୂନ୍ୟ ହୋଇ ଅଛି

ଶ୍ରୀହୀନ ସବୁଜ କ୍ଷେତ

 ଆଶା ବୈତରଣୀ ଶୁଖି ଯାଇଅଛି

ଶୁଭୁଛି ଉଜୁଡା ଗୀତ ।

ଉଜୁଡ଼ା ମନର ଗୀତ ଶୁଭୁଅଛି

ଦାଦନ ଖାଦାନ ପାଶେ

ସଂସାର ର ଭାର ବୋହି ନ ପାରି ସେ

ଆଶ୍ରୟ ଖୋଜେ ସାହସେ ।

କେତେ ଅପମାନ କେତେ ଅସମ୍ମାନ

କେତେ ଯେ ଟାହି ଟାପରା

ଉଜୁଡ଼ା ମନର ବ୍ୟଥା କେ ବୁଝିବ

ଆଜି ସିଏ ଘରଛଡା ।

ଉଜୁଡା ମନର ଗୀତ ଶୁଭୁଅଛି

ବୈଧବ୍ୟର କାରୁଣ୍ୟ ରେ

ହଜି ଯାଇଛି ତା ଶଙ୍ଖା ଓ ସିନ୍ଦୁର

ମନେ ମନେ ଝୁରି ମରେ ।

ବାହାବେଦୀ ସ୍ୱପ୍ନ ଶ୍ମଶାନେ ଝୁଲଇ

ପାଉଁଶ ସାଉଁଟି ଖୋଜେ

ସବୁ ରଙ୍ଗ ଆଜି ବେରଙ୍ଗ ହୋଇଛି

ଲୁହରେ ଅଗଣା ଭାସେ ।

ଉଜୁଡ଼ା ମନର ଗୀତ ଶୁଭୁଅଛି

ଦୁର୍ଘଟଣା ସ୍ଥଳେ ସ୍ଥଳେ 

ପିତା ମାତା ଆଗେ ସନ୍ତାନ ପଳାଏ

କାନି ଭିଜେ ଆଖି ଜଳେ ।

ସନ୍ତାନର ସ୍ଵର ଆଉ ଶୁଣିବନି

ଶୁଣିବନି ତାର ଅଳି

ବାପା ପାଶେ ଅଳି କରି କହିବନି

ବାପା ମନ ଯାଏ ଜଳି ।

ଉଜୁଡ଼ା ମନର ଗୀତ ଶୁଭୁଅଛି

ପ୍ରେମ ନଦୀ ତୀର ଧାରେ

ପ୍ରତାରିତ ହୋଇ ପ୍ରେମ ଯମୁନାର

ବେଦନାର ଲୁହ ଝରେ ।

ଉଜୁଡ଼ା ମନର ଗୀତ ଶୁଭୁ ଅଛି

ବୃଦ୍ଧାଶ୍ରମ ବାରଣ୍ଡାରୁ

ଫଳନ୍ତି ସମୟ ଚାଲି ଯାଇଅଛି

ଝୁରୁଛି ଯେ ହୃଦୟରୁ ।

ଆଶାବାଡି ତାକୁ ନିରାଶା କରିଛି

ମମତା ଗୁମୁରି କାନ୍ଦେ

ଯନ୍ତ୍ରଣା ଦଗ୍ଧ ତା ବ୍ୟଥିତ ପରାଣ

ସ୍ମୃତିରେ ନିଜକୁ ଛନ୍ଦେ ।

ନିଜ ପେଟ କାଟି ଦେଉଥିଲା ସିନା

ଆଜି ତା ପେଟ ଅପୋଷା

ଗୋଟେ ପେଟ ପାଇଁ ଅସମର୍ଥ ବୋଲି

ମିଳେ ତାକୁ କଟୁ ଭାଷା ।

ଯେ ଦିଗେ ଚାହିଁବ ସେ ଦିଗେ ଶୁଭୁଛି

ଉଜୁଡା ମନର ଗୀତ

ଉଜୁଡ଼ା ମନକୁ ସଜାଡିବା ପାଇଁ

ନେବା ଟିକେ ପଦକ୍ଷେପ ।

ଅର୍ଥ ନଥିଲେ ବି ସାଥ ଦେଇକରି

ଦୁଃଖ କିଛି ବାଣ୍ଟି ନେବା

ମନୋବଳ ଦେଇ ବିଶ୍ୱାସ ଜଗାଇ

ଜୀବନ ଗୀତି ଗାଇବା ।

ଜୀବନ ଗୀତିର ଛନ୍ଦରେ ଛନ୍ଦରେ

ମନୋଭୂମି ଚଷି ନେବା

ପାଖେ ଛିଡା ହୋଇ ପିଠି ଥାପୁଡେଇ

ସାହସ ଯେ ଭରି ଦେବା ।

ଉଜୁଡା ମନଟି ସଜାଡି ହୋଇବ

ସପନ ଜାଗି ଉଠିବ

ଆତ୍ମସନ୍ତୋଷର ସୁଖ ସାଉଁଟିବା

ଜୀବନ ସାର୍ଥକ ହେବ ।