ତୁମେ ଗଲା ପରେ

ତୁମେ ଗଲା ପରେ ମନ ଉପବନେ

ଉଡୁନାହିଁ ପ୍ରଜାପତି

ତୁମ କଥା ଭାଳି ନିଦ ହେଉ ନାହିଁ

ବିରହେ ବଢୁଛି ତାତି l

ତୁମେ ଗଲା ପରେ ମୋ ଜୀବନ ଲାଗେ

ବେରଙ୍ଗି ଫଗୁଣ ପରି

ଫିକା ଫିକା ଲାଗେ ଏ ଧାରା ଶ୍ରାବଣ

ହୃଦୟେ ଶୂନ୍ୟତା ଭରି l

ତୁମେ ଗଲା ପରେ ମୋ ସୁଖ ନଅର

ହୋଇଗଲା ଛାରଖାର

ଭରସା ବିଶ୍ୱାସ ସବୁ ତୁଟିଗଲା

ହାରିଗଲା ପ୍ରେମ ମୋର l

ତୁମେ ଗଲା ପରେ ଆମ ସମ୍ପର୍କରେ

ପଡିଗଲା ଯବନିକା

ଭାବିଲନି ଥରେ କେମିତି ବଞ୍ଚିଛି

ଜୀବନରେ ଏକା ଏକା l

ତୁମେ ଗଲା ପରେ କାଠ ଗଣ୍ଡି ପରି

ଭାସୁଛି ମଝି ନଈରେ

କୂଳ କି କିନାରା ଜମା ପାଉ ନାହିଁ

ଏ ଅଲୋଡ଼ା ଜୀବନରେ l

ତୁମେ ଗଲା ପରେ ଯାଯାବର ଭଳି

ଆଜି ଏଠି କାଲି ସେଠି

ମରି କି ବଞ୍ଚିଛି କାନ୍ଦି କି ହସୁଛି

ଅଭିନୟ ରଙ୍ଗ ମାଖି l