ତୁମେ ଦୁଇ ଗୋଟି ହୀରା

କୃଷ୍ଣ ,ବଳରାମ ଅଝଟ ହୁଅନା

ଶୁଣାଉଛି ଏକ କଥା ,

ସେ କଥା ଶୁଣିଲେ ଦୂର ହୋଇଯିବ

ତୁମ ମନ ଆବିଳତା ।

ତ୍ରେତୟା ଯୁଗରେ ଦଶରଥଙ୍କର

ଚାରିଗୋଟି ପୁଅ ଥିଲେ ,

ରାମ,ଲକ୍ଷ୍ମଣ ଯେ ଭରତ, ଶତ୍ରୁଘ୍ନ

ଅତି ସୁକୁମାର ପିଲେ ।

ଭାଇ ଭାଇ ମଧ୍ୟେ ଥିଲା ସ୍ନେହ,ପ୍ରେମ

ପିତୃ ମାତୃ ଭକ୍ତି ଭାବ ,

ଜଣଙ୍କ ପାଇଁକି ଆଉ ଜଣେ ଭାଇ

ରାଜ୍ୟ କରୁଥିଲେ ତ୍ୟାଗ ।

ସତ୍ୟ ରକ୍ଷା ଆଉ ଧର୍ମ ରକ୍ଷା ଲାଗି

ଭୋଗିଥିଲେ ବହୁ କ୍ଳେଶ ,

ଯୁଗ ଯୁଗ ପାଇଁ ତାଙ୍କ ଭ୍ରାତୃପ୍ରେମ

ଅଛି ହୋଇ ଆଦରଶ ।

ଲବଣୀ ଟିକିଏ ଖାଇବାକୁ ଏଠି

ଗୋଳ କରୁଅଛ ଦୁହେଁ ,

ଦହି ହାଣ୍ଡି ଭାଙ୍ଗି ଫୋପଡ଼ାଇ ଦେଲ

ଇଏ ଜମା ଭଲ ନୁହେଁ ।

ପିତା ମାତାଙ୍କର ନୟନ ସଙ୍ଖାଳି

ତୁମେ ଦୁଇ ଗୋଟି ହୀରା ,

ଆମ ଆଶା ଆଉ ଭରସା ଯେତେକ

ମିଶିକି କରିବ ପୂରା ।