କଳ୍ପନାରେ ତୁମେ

କଳ୍ପନାରେ ତୁମେ ଭାବନାରେ ତୁମେ

       ପ୍ରତି କୋଣ ଅନୁକୋଣ

ତୁମରି ମହିମା ଗାୟନ କରନ୍ତି

      ଦିବା ରାତ୍ର ପ୍ରତି କ୍ଷଣ।

ତୁମେ ଜଗନ୍ନାଥ ଲୀଳା ତ ବିଚିତ୍ର

      ନ ବୁଝନ୍ତି ଲେଶ କେହି

ତୁମ ଡୋରି ହେଲେ ଭକତ ଗହଳ

       ତୁମ ପାଶେ ରହି ରହି।

ଆନନ୍ଦ ବଜାର ଅବଢ଼ା ବାସ୍ନାରେ

       ହୋଇ ଉଠେ ମହକିତ

ତୁମ ବଡଦାଣ୍ଡ ଜନ କୋଳାହଳେ

       ଲାଗି ଥାଏ ଆତଯାତ।

ଯେତେ ଦେଖୁଥିଲେ ନୂଆ ଦିଶୁ ଥାଅ

       ହେ ପ୍ରଭୁ ଚକା ନୟନ

ମନ କଥା ସବୁ ଜାଣ ବୋଲି ନାଥ

        ଜିଣି ପାର ସବୁ ମନ।

ମନ କଳ୍ପ ବଟ ତଳେ ବସି ରହି 

       ମୁହିଁ ଦେଖେ ତୁମ ଛବି 

ଆହାକି ସୁନ୍ଦର ପୀତ କଳେବର

       ସକାଳ ସଞ୍ଜର ରବି।