ତୁମ ପାଇଁ ପଦେ

କୋଟିଏ ମୁକ୍ତା ରୁ ଗୋଟିଏ ଶବ୍ଦ ଯେ 

ବାଛି ଆଣି ଯୋଡି ଦିଅ ।

ଅମୂଲ୍ୟ ତୁମର ଶବ୍ଦ ସଂଯୋଜନା 

କାହୁଁ ତୋଳି ଆଣି ଥୁଅ ।

ଜଣାନାହିଁ ମତେ ସ୍ବର ତାଳ ଲୟ 

ଜଣାନାହିଁ ଅଳଙ୍କାର ।

ଗଜ ମୁର୍ଖ ମୁହିଁ ସତ କହୁଚି ଗୋ

ବୁଝେନି ତୁମ ଅନ୍ତର ।

କୋଟି ଜନ୍ମ ପୂଣ୍ୟ ଫଳେ ଆଜି ମୁହିଁ 

ତୁମକୁ ପାଏ ନିକଟେ ।

ଦୋଷ ଧରିବନି ମୋର ଆହେ ସଖା 

ରହିବ ମୋ ହୃଦ ତଟେ ।

ଭୁଲି ଯିବନାହିଁ ମୋର ଏ ସ୍ମୃତି କୁ 

ଅଳ୍ପକେ ମନେ ରଖିବ।

ତୁମେ ସଖା ମୋର ହୃଦୟରେ ଅଛ

ଜୀବନେ ଭୁଲି ନ ହବ ।

ମରିବା ପୂର୍ବରୁ ତୁମଙ୍କୁ ଭାବିବି 

ଆଖିରେ ଦେଖିବା ପାଇଁ ।      

ନଦେଖିଲେ ସଖା ପ୍ରାଣ ମୋର ଏଠି

କଷ୍ଟ ହେବ ଯିବା ପାଇଁ ।

ଭୁଲି ବାର ନାହିଁ ମନରୁ ମୋହର 

ତୁମର ଅଭୂଲା ସ୍ମୃତି ।

ଅମୁହାଁ ଢାଳିଚ ସ୍ନେହ ମମତା ଯେ 

ମୋ ଜୀବନେ ସିଏ ମୋତି ।

ସ୍ବାଭିମାନ ଭରା ହୃଦୟ ତୁମର 

କଥା କୁହ ମାପି ଚୁପି ।

ଜଗିଥାଅ ସଦା ଇଜ୍ଜତ ମୋହର 

ମୋ ଖୁସିରେ ତୁମ ତୃପ୍ତି ।

ଶେଷରେ ଏତିକି ମାଗୁଣି ତୁମକୁ

ସୂତାଖିଏ ସ୍ନେହ ଦବ ।

ସେତିକି ମୋ ପାଇଁ ସ୍ବର୍ଗ ସୁଖ ସମ

ରହୁଛି ପ୍ରଣାମ ନବ ।