ପଖାଳ ଦିବସ
ପଖାଳ ଦିବସ
ଫଗୁଣ ଚାଲିଲା ଚୈତ୍ରମାସ ହେଲା
ପ୍ରକୃତି ରାଣୀ ତାତିଲା ।
ଗରମରେ ଖାଦ୍ୟ ଭଲ ନ ଲାଗିଲା
ପଖାଳ ମନ ଟାଣିଲା ।
ଚଷାଭାଇ ମୋର ନାଲି ଚାଉଳରେ
ପଖାଳ ଦିବସ ପାଳେ ।
ନାଲି ପଖାଳ କୁ ବଡି ଆଳୁ ଭର୍ତ୍ତା
ଖୁସିରେ ଖାଆନ୍ତି ମେଳେ ।
ଟାଉନୁରୁ ଆମେ ଘରମୁହାଁ ହେଉ
ଖାଇବୁ ବୋଲି ପଖାଳ ।
ଗାଆଁ ଶାଗଭଜା ଆଳୁପୋଡା ପୁଣି
ଟମାଟୋ ପୋଡାର ମାଳ ।
ଶାଗଭଜା ପୁଣି ଚୁନା ମାଛ ଭଜା
ଆହୁରି ଆମ୍ବୁଲ ଦଳା ।
କଞ୍ଚା ରଶୁଣ କୁ କୋକୁଳି ଶୁକୁଆ
କଞ୍ଚା ଲଙ୍କା ହୁଏ ଦଳା ।
ମାଆ ବାଢିଦିଏ ମାଟି ହାଣ୍ଡି ଭାତ
ବାସ୍ନା ହୁଏ ମହ ମହ ।
କାଇଁ ସେ ପଖାଳ ଖୋଜୁଛି ଆଜି ମୁଁ
ମାଟି ହାଣ୍ଡି ଭାତ ମୋହ ।
ସହରୀ ପଖାଳ ଲୋକ ଦେଖାଣିଆ
ନଥାଏ ଭାରତ ବାସ୍ନା ।
ଗରମ ଭାତରେ ଥଣ୍ଡା ପାଣି ଭରି
ଦହି ଲେମ୍ବୁ ହୁଏ ବାସ୍ନା ।
ଆଜି ଠାରୁ ପରା ପଖାଳ ଦିବସ
ବିଶ୍ୱ କରୁଛି ପାଳନ ।
ଆମ ଓଡିଆଙ୍କ ସବୁ ଦିନ ପରା
ପଖାଳ ହୁଏ ଭୋଜନ ।
ଶ୍ରୀ ଜଗନ୍ନାଥଙ୍କ ଘିଅ ପଖାଳ ତ
ଲାଗେ ବହୁତ ନିଆରା ।
ଦହି ପଖାଳ ର ଟଙ୍କତୋରାଣି ରେ
ମନ ଶାନ୍ତି ହୁଏ ପରା ।
ବଡ ଠାକୁରଙ୍କ ପଖାଳ ମହିମା
କିଏ ବଖାଣି ପାରନ୍ତି ।
ଛପନ ଭୋଗ ରୁ ଅଧିକ ଆଗ୍ରହେ
ଗ୍ରହଣ ପ୍ରଭୁ କରନ୍ତି ।
ଆମେ ଓଡିଆ ତ ଭାରି ବଢିଆ ହେ
ସବୁ ପରମ୍ପରା ପାଳୁ ।
ବାର ମାସେ ତେର ପର୍ବ ପ୍ରଚଳିତ
ଭକ୍ତିରେ ତାହାକୁ ପାଳୁ ।