ତୁମ ଗାଁ

ତୁମେ କହୁଥିଲ ତୁମ ଗାଁ ଭଲ

ମୋତେ ମୋର ଗାଆଁ ଭଲ

ତୁମ ଗାଁ କଥା ତୁମକୁ ତ ଜଣା

ମୋ ଗାଆଁ ଅମୂଳମୂଲ ।

ମନେପଡ଼େ ଆଜି ସେଇ ଦିନ କଥା

ମନେପଡ ତୁମେ ଯେବେ,

କହୁଥିଲ ହସି ତୁମ ଗାଆଁ ଗାଥା

ଲାଗେ ସବୁ ଏବେ ଏବେ ।

ଏଇ ନଈ ଦେଖ ସାକ୍ଷୀ ଆଜିଯାଏଁ

ତୁମ ,ମୋର ମୂକ ସାକ୍ଷୀ,

ତୁମ ଗାଆଁ ଅଛି ନଈ ଆରପାରି

ଏ ପାରି ମୋ ଗାଆଁ ଅଛି ।

ସୁଲୁସୁଲୁ ବହି ବାଆ ଯେତେବେଳେ

ତୁମ ଗାଆଁ ପଟୁ ଆସେ,

ତୁମରି ବାରତା ପଣତରେ ବାନ୍ଧି

ଉଭା ହୁଏ ମୋର ପାଶେ ।

କହୁଥାଏ ନିତି ତୁମରି ବାରତା

ଶୁଣି ବିମୋହିତ ମୁହିଁ,

ସେହିଦିନୁ ଦେଖ ଭଲଲାଗେ ମୋତେ

ତୁମ,ମୋର ଗାଆଁ ଦୁଇ ।

ଭାରି ଭଲ ଲାଗେ ଏବେ ତୁମ ଗାଆଁ

ଯଦିଓ ମୋ ଗାଆଁ ଭଲ,

ମନେପଡ଼େ ଏବେ ଯେବେ ପଡ ମନେ

ନଈର ସେ ପ୍ରୀତି ଧାର ।

ଉଛୁଳା ନଈରେ କେମିତି ସେଦିନ

ମନ ଏକ ହୋଇଥିଲା,

ତୁମ ଗାଆଁ ମୋର ,ମୋର ଗାଆଁ ତୁମ

ମନ ବରି ନେଇଥିଲା ।

ଦେଉଳର ଦିଅଁ ,ନଈ ବରଗଛ

ଢାଳୁଥିଲେ ପ୍ରୀତି ବାରି,

ଆଶିଷେ ତାଙ୍କରି ତୁମ ଗାଆଁ ସାଥେ

ମୋ ନାଆଁ ହୋଇଛି ଯୋଡ଼ି ।