ଟୋପାଏ ଲୁହ

ଟୋପାଏ ଲୁହରେ, ଭାସିବ ସଂସାର, 

ଭାବି ନ ଥିଲି କି, ଜାଣି ନ ଥିଲି-ମୁଁ !

କୁଳ ଇଙ୍ଘି କେବେ, ଆସିବ ଜୁଆର, 

ଭାବି ନଥିଲି କି, ଜାଣି ନଥିଲି-ମୁଁ !

ବୁନ୍ଦା ବୁନ୍ଦା ମିଶି, ସୃଷ୍ଟି କଲେ ନଈ, 

ନଈଟି ମିଶିଲା, ସାଗରରେ ଯାଇ, 

ସାଗରଟି ଅଟେ, ଏତେ ଯେ ଗଭୀର, 

ଭାବି ନଥିଲି କି, ଜାଣି ନଥିଲି-ମୁଁ !

ପାଇଲି କାହାଠୁ, ଦେଲି ମୁଁ କାହାକୁ, 

ଦେଇ ନ ପାରିଲେ, ହରାଇଲି ତାକୁ, 

ସମ୍ବନ୍ଧରେ ଚାଲେ, ଏମିତି ବେପାର, 

ଭାବି ନଥିଲି କି, ଜାଣି ନଥିଲି-ମୁଁ !

ଦୁଃଖଟି ନିଜର, କାହାକୁ କହିବ, 

ରକତର ଧାରା, ଲୁହରେ ବୋହିବ, 

ସଂସାରରେ ନୁହେଁ କେହି ଯେ କାହାର, 

ଭାବି ନଥିଲି କି, ଜାଣି ନଥିଲି-ମୁଁ !