ଜରୁରୀ ଥିଲା
ଜରୁରୀ ଥିଲା
ଆଖିରେ ବସା ବାନ୍ଧିଥିବା ଲୁହକୁ
ବହି ଯିବାଟା ବି ଜରୁରୀ ଥିଲା
ଭଲ ପାଇବାଟା ହୁଏତ ଜରୁରୀ ଥାଏ
କିନ୍ତୁ ଏବେ ବିଚ୍ଛେଦଟା ବି ଜରୁରୀ ଥିଲା ।
ବାଲି ଘର ତୋଳି ଖେଳୁ ଖେଳୁ
ସତ ଘରର ସ୍ୱପ୍ନ ଦେଖିବା
ଆଉ ସେ ସ୍ୱପ୍ନରେ ଡେଣା ଲାଗୁ ଲାଗୁ
ସ୍ୱପ୍ନ ଭାଙ୍ଗିବାଟା ବି ଜରୁରୀ ଥିଲା ।
ହୃଦୟକୁ ଚୋରି କରୁ କରୁ
ଚୋରି କରିଥିବା ହୃଦୟରେ ନିଜକୁ ଦେଖିବା
ଏବଂ ନିଜ ହୃଦୟରେ ସେଇ ଚେହେରାକୁ
ଭଗବାନଙ୍କ ଦରଜା ଦେବା ବି ଜରୁରୀ ଥିଲା ।
ହାତର ପାପୁଲି ଦେଖେଇ
ଭାଗ୍ୟରେ କେବଳ ତୁମେ ହିଁ ଅଛ କହି
ଆଉ କାହା ନାଁ ର ମେହେନ୍ଦି ଲଗେଇ
ସଜେଇ ହେବାଟା ବି ଜରୁରୀ ଥିଲା ।
ସାତ ଜନ୍ମର ସାଥି ହେଇ
ଏକାଠି ବଞ୍ଚିବାର କଥା ଦେଇ
ଅଧାରୁ ବାଟଭାଙ୍ଗି ଚାଲି ଯିବାପାଇଁ
ନିଷ୍ପତ୍ତି ନେବାଟା ବି ଜରୁରୀ ଥିଲା ।
ଚେହେରା ସେମିତି ଅଛି
ତୁମେ ବି ସେମିତି ଅଛ
ଆଉ ମୁଁ ବି ସେମିତି ଅଛି ହେଲେ
ବୋଧେ ନୀରବତା ବି ଜରୁରୀ ଥିଲା ।
ଯେଉଁ ଦୁଇ ଆଖି ଦିନେ
ସାମ୍ନା ସାମ୍ନି ହେଉଥିଲେ
ଦୁହିଁଙ୍କ ଭିତରେ ପ୍ରେମର ଆଦାନ ପ୍ରଦାନ ଥିଲା
ସେଇ ଆଖି ଆଜି ତଳମୁହାଁ ହେବା ବି ଜରୁରୀ ଥିଲା ।
ହୃଦୟରୁ ବାହାରିବା ପରେ ଆଜି
ଅଜଣା ପଥରେ ପାଗଳ ପରି ନିଜର
ଅସ୍ତିତ୍ୱ ହରେଇ ବୁଲିବାର ଥିଲା ଏବଂ ବୁଲୁ ବୁଲୁ
ମନେ ପଡ଼ିଲା କି ହଁ ଏମିତି ବୁଲିବା ବି ଜରୁରୀ ଥିଲା ।
ଦୁଇଜଣ ଏକାଠି ପ୍ରାର୍ଥନାରେ
ନିଜର ସମ୍ପର୍କର ଦୃଢ଼ତାକୁ ନେଇ
ନିଜର ଆରାଧ୍ୟ ଜଗନ୍ନାଥଙ୍କ ନିକଟରେ ମାଗିବା
ଏବଂ ପରେ ସେ ପ୍ରାର୍ଥନାର ଭାଙ୍ଗିବା ବି ଜରୁରୀ ଥିଲା ।
ହଁ ହଁ ଜରୁରୀ ଥିଲା
ନିହାତି ଜରୁରୀ ଥିଲା
ଆଖିରେ ଛଳ ଛଳ ହେଇ ପୂର୍ଣ୍ଣ ଥିବା
ଲୁହର ଝରି ପଡ଼ିବାଟା ବି ଜରୁରୀ ଥିଲା ।