" ମୁଁ ଏମିତି ପ୍ରେମିକଟିଏ"
" ମୁଁ ଏମିତି ପ୍ରେମିକଟିଏ"
ମୁଁ ଏମିତି ପ୍ରେମିକ ଟିଏ
ଯିଏ ପ୍ରେମିକାର ଛବି କୁ ନେଇ
ନିଜ ସଙ୍ଗେ କଥା ହୁଏ -
ନଈ ପଠା ଧାରେ
ଆମ୍ବ ବଉଳ ବାସ୍ନାରେ ଅବା
ଗୋଲାପର ନରମ ପାଖୁଡାରେ
ମୋ ପ୍ରେମିକାକୁ ଅନୁଭବ କରେ ।
ଚଉରା ର ସଞ୍ଜବତୀ
ମନ୍ଦିରର ଘଣ୍ଟା ଆଳତୀ ପାଖରେ
ତା ମୁହଁଟା ଜକ ଜକ ଦିଶେ ।
ମୋର ସମସ୍ତ କଳ୍ପନା ଜଳ୍ପନାର
ଆବେଗ ମାନେ
କଣ୍ଠ ରୋଧ କରୁଥାନ୍ତି
ହେଲେ ଶବ୍ଦ ରୂପ ନ ନେଇ
ପୁଣି ହୃଦୟରେ ଲୀନ ହୋଇ ଯାନ୍ତି ।
ମୁଁ ଏମିତି ପ୍ରେମିକଟିଏ
ସପନରେ ପହଁରି ପହଁରି
ଆନନ୍ଦ ସାଉଁଟେ ସିନା
ମୁହଁ ଖୋଲି କହି ପାରେ ନାହିଁ ।
ହେଲେ ତା ମୁହଁରେ ହସ ଦେଖି ଦେଲେ
ମୋ ମନଟା ଉତ୍ଫୁଲ୍ଲିତ ହୁଏ ।
ମୁଁ ଏମିତି ପ୍ରେମିକଟିଏ
ପ୍ରେମିକା କୁ କହିନାହିଁ
ମୋ ମନର କଥା
ଅନେକ ଶଦ୍ଦ ଭଉଁରୀର ଭିଡ଼ରେ
ଛନ୍ଦି ହୋଇ ଅଣନିଃଶ୍ଵାସୀ
ହୋଇଯାଏ--
କେତେବେଳେ ମୋର ଦାରିଦ୍ର୍ୟତା
ପୁଣି କେତେବେଳେ ମୋ
ଜାତି ଶିରୋନାମା -
ମୋତେ ଦୁର୍ବଳ କରିଦିଏ
ଆଉ,
ମୁଁ ଚୁପ୍ ଚାପ ମୋର ପ୍ରେମିକ ପଣିଆକୁ
ନିଜ ଭିତରେ ବନ୍ଦ କରିଦିଏ
ଅବା,
ସମସ୍ତ କଳ୍ପନା ଜଳ୍ପନା ଆବେଗର
ସମାଧି ଟେ ରଚେ ।