ଟଙ୍କା
ଟଙ୍କା
ଧନ ଅରଜିଲେ ଧରମ କରିବ
ଧରମରେ ନରହରି ।
ପ୍ରାପତ ହୋଇବେ ତୁମକୁ ନିଶ୍ଚୟ
ସ୍ବରୂପେ ରହ ତୁମରି ।୧।
ଟଙ୍କା ଅରଜିବା ସହଜ ନୁହଇ
ଅଥବା କଷ୍ଟ ନୁହଇ ।
ଅରଜିବା ଧନ ସଦା ସରବଦା
ନିଜ ଧରମରେ ଥାଇ ।୨।
ଅଧରମ ବିତ୍ତ ବହୁତ ବଢଇ
ଗଲାବେଳେ ମୂଳସହ ।
ଯାଇଥାଏ ନିଶ୍ଚେ କେବେହେଲେ କେହି
ନକର ଏଥି ସନ୍ଦେହ ।୩।
ଅରଜିଲେ ଟଙ୍କା ଧରମ କାର୍ଯ୍ୟରେ
ବ୍ୟୟ କର ସେ ଟଙ୍କାକୁ ।
ସ୍ବଧରମେ ରହି ଖର୍ଚ୍ଚ କର ନିଶ୍ଚେ
ସତ୍ ଉପାୟରେ ତାକୁ ।୪।
ବଢିଲା ବେଳେ ସେ ପ୍ରବଳ ବଢଇ
ମାନେ ନାହିଁ ଥଳକୂଳ ।
ଟଙ୍କା ଉପାର୍ଜନ କରିବା ପାଇଁକି
ଖଟାଇଲେ ବୁଦ୍ଧି ବଳ ।୫।
ଅଳ୍ପରୁ ବହୁତ ହୋଇଥାଏ ଟଙ୍କା
କରିଲେ ତାକୁ ସଞ୍ଚୟ ।
ନୂଆ ନୂଆ କେତେ ବୁଦ୍ଧି ଆସି ଜୁଟେ
ବୃଦ୍ଧି ହୁଅଇ ନିଶ୍ଚୟ ।୬।
କେତେବେଳେ କେଉଁ ବାଟରେ ଖରଚ
ହୋଇଯାଇଥାଏ ସିଏ ।
ଟଙ୍କା ପାଶେ ଥିଲେ ନିଜ ଲୋକଠାରୁ
ଭୟ କେବେ ମିଳିଥାଏ ।୭।
ପୁଅ କହେ ଟଙ୍କା ଏତେ ଦିଅ ମୋତେ
ନହେଲେ ଭୂଷିବି ଛୁରୀ ।
ସ୍ତିରୀ କହେ ମୋତେ ଏତେ ଟଙ୍କା ଦିଅ
ନହେଲେ ଯିବି ବାହାରି ।୮।
ଚୋରି କରିବାକୁ ଚୋର କେବେ ଆସେ
ଟଙ୍କା ଚୋରି କରିବାକୁ ।
ନିଜ ଲୋକ ଧାର ଉଧାର ନେଇ ତା
ନଆସନ୍ତି ଶୁଝିବାକୁ ।୯।
ସମ୍ପତ୍ତିର ଟଙ୍କା କାରଣ ହୁଅଇ
ବିପତ୍ତି କାରଣ ହୁଏ ।
ଟଙ୍କା ଥିଲେ ଚିନ୍ତା ନଥିଲେ ବି ଚିନ୍ତା
କେତେ ଅଶାନ୍ତି କରାଏ ।୧୦।
ଟଙ୍କାର ମହିମା କହିଲେ ନସରେ
ସବୁ ହୁଏ ଟଙ୍କା ପାଇଁ ।
ନଶ୍ବର ସଂସାରେ ଟଙ୍କା ଆବଶ୍ୟକ
ସଦା ସର୍ବଦା ହୁଅଇ ।୧୧।