ଠିକା ଚାକିରିଆ

ଠିକାରେ ଚାକିରୀ ତାହାଠୁ ବେକାରୀ

    ଅଟେ ଭାଇ ଶ୍ରେୟସ୍କର

ଗାଡି ଖର୍ଚ୍ଚ ପାଇଁ    ଦରମା ଅଣ୍ଟେନି

     ପାଉଛି ନଅ ହଜାର ।

ଦିନକୁ ଦରମା     ତିନି ଶହ ଟଙ୍କା

    ଚାଉଳ କିଲ ତିରିଶି

ପରିବାର ଦର    ନ କହିଲେ ଭଲ

    ଗ୍ରୋସରି ତାହାଠୁ ବେଶି ।

ଲାଇନ ମିଟର      ଗ୍ୟାସର ଦର

     କେବୁଲ ଓ ମୋବାଇଲି

ନ ହେଲେ ଚଳେନି ମୋର ଘରମଣୀ

     ନିତି ଲଗାଏ ସେ କଳି ।

ରୁଷି କି ଗଲେଣି   ମାସଟେ ହେଲେଣି

    ଲେଉଟାଣି ତାର ନାହିଁ

ତାର କଡା ବାଣୀ   ପୋଷି ପାରିବନି 

     ବାହା ହେଉଥିଲ କାହିଁ ।

ପୁଅ ଝିଅ ମୋର     ନିତି ଗର ଗର

    କନଭେଣ୍ଟ ପଢିବାକୁ

ଅସୁବିଧା ମୋର    କିଏ ବା ବୁଝିବ

    କହିବି ବା ମୁଁ କାହାକୁ ।

ଘରେ ବଡ଼ଭାଇ    ଦି ପଦ କୁହନ୍ତି

    ତୋ କଥା ତୁହି ଯେ କଲୁ

ଚାକିରୀ କରିଲୁ   ସ୍ୱାର୍ଥପର ହେଲୁ

    ଘରକୁ କିଛି ନ ଦେଲୁ ।

ମୋର ଶଳା ଶାଳୀ    ଫୋନ କରନ୍ତି

    ନନା ଆସ ବୁଲିବାକୁ

ହଁଅ ହାଁଆ କହି     ଚୁପ୍ ଚାପ୍ ରହି

     ନିନ୍ଦେ ଫଟା କପାଳକୁ ।

ପୁନିଅଁ ପରବ     ଆମର ଗୌରବ

    ଶୁଣି ଶୁଖିଯାଏ ତଣ୍ଟି

ଖାଲି ମୂଷାଟିଏ     ଗାତରେ ପଶୁନି 

    ଲାଙ୍ଗୁଳେ ବାନ୍ଧୁଛ ଘଣ୍ଟି ।

କେତେ ସାଙ୍ଗ ସାଥୀ   ନିଇତି ଡାକନ୍ତି

    ଯାଇ ମୁଁ ପାରେନି ସାଥେ

ଛୋଟିଆ ପଣତ     ନିଅଣ୍ଟ ହୁଏ ତ 

     ମାପି ଚୁପି ଚାଲେ ପଥେ ।

କାମରେ କୋହଳ   ନାହିଁ ତ ଆମର

    ଆମେ ତ ଠିକା ଚାକର

ଅଭିଯୋଗ ଏଠି  ଯେତେ ବାଢିଲେଟି

    ଶୁଣେ ନାହିଁ ସରକାର ।