ତ୍ରିରଙ୍ଗା -ଏ ଜାତିର ସ୍ୱାଭିମାନ

ଛଅସ୍ତରୀ ତମ ସ୍ୱାଧୀନ ଦିବସ

ଡାକିଲାଣି ହାତ ଠାରି

ମାଆ ମାଟିର ସେ ଆକୁଳ ଚିତ୍କାର

ଶ୍ରବଣେ ପଡୁଛି ହୁରି l

ବିଦେଶୀ ଶାସନ ଯନ୍ତ୍ରଣା ଜଉରେ

କି ଅବା ସହିନି ମାଟି

କେତେ ତ୍ୟାଗବଳେ ମହାମାନବ ହେ

ଖୋଲିଲ ନିର୍ଭୟ ପାଟି l

ଉନ୍ମୁକ୍ତ ସେହି ବଜ୍ର ଆହ୍ୱାନେ

ଶତ୍ରୁ ହେଲେ ଧରାଶାୟୀ

ଏକତାର ବଳେ ମୁକ୍ତ ହୋଇଲା

ମାଆ ମୋ ମମତା ମୟୀ l

ଗାନ୍ଧୀ ଡାକ ଦେଲେ ଅହିଂସା ବଳରେ

ଦେଶକୁ କରିବା ମୁକ୍ତ

ସୁଭାଷଙ୍କ ବାଣୀ ସଶସ୍ତ୍ର ସଂଗ୍ରାମ

ତାତୁଛି ଆମର ରକ୍ତ l

ବକ୍ସି ଦେଖାଇଲେ ଅସହଯୋଗର

ନୂତନ ଅସ୍ତ୍ରର ସ୍ୱାଦ

ଫେରିଯାଅ ତୁମେ ଫିରିଙ୍ଗି ଜାତିଟା

ନିର୍ଲଜ୍ଜ ପ୍ରତିବାଦ l

ଆମ ମାଟି ପରେ ଆମକୁ ଶାସନ

ଏ କେଉଁ ଶାସ୍ତ୍ରର କଥା

ପରଜୀବୀ ତୁମେ ଆସି ଏ ଦେଶକୁ

ବଢ଼ାଇଲ ଆମ ବ୍ୟଥା l

ତଥାପି ତୁମର ପ୍ରତିହତ ପାଇଁ

ଏକତା ଶିଖାଇ ଦେଲ

ଜାତୀୟତା ପଣେ ତୁମ ବିରୁଦ୍ଧରେ

ସଭିଙ୍କୁ ଏକାଠି କଲ l

ସାରା ଦେଶଟାରେ ବିଦ୍ରୋହର ବହ୍ନି

ଜଳେ ହୁତୁ ହୁତୁ ହୋଇ

ଶିର ଦେବୁ ପଛେ ଡରି ଯିବୁ ନାହିଁ

ଦେଶର ମୁକତି ପାଇଁ l

ଉଣେଇଶି ଶହ ଶତଚାଳିଶି ବର୍ଷ

ଅଗଷ୍ଟ ପନ୍ଦର ଦିନ

ଉଡ଼ିଲା ତ୍ରିରଙ୍ଗା ବିଜୟ ଦର୍ପରେ

ଏ ଜାତିର ସ୍ୱାଭିମାନ l

ସ୍ୱାଧୀନ ଭାରତ ସନ୍ତାନ ଆମେ

ଆମେ ଏ ଦେଶର ରକ୍ତ

କୋଟିଏ କଷଣ ସହିଯିବୁ ଆମେ

ମାଟି ପାଇଁ ଦେଶ ଭକ୍ତ l

କଦମ୍ କଦମ୍ ଆଗେଇ ଚାଲିଛୁ

ଶିଳ୍ପ କାରିଗରୀ ସାଥେ

ଶିକ୍ଷା, ସ୍ୱାସ୍ଥ୍ୟ ସଙ୍ଗେ ଭ୍ରାତୃତ୍ୱ ବାଣ୍ଟିବୁ

ବନ୍ଧୁର ଏଇ ପଥେ l

ପ୍ରଣତି ଘେନମା' ମୋ ଦେଶ ଭାରତ

ଆର୍ଯ୍ୟlବର୍ତ୍ତର ମାଟି

ସଂପ୍ରୀତି ସୋହାଗ ଭାଇଚାରା ମନ୍ତ୍ରେ

ପୂରି ଉଠିବ ତୋ ଛାତି l