ସୁନାପିଲା

କାମ ସାରି ଜେଜେ ହାଲିଆ ହୋଇ ।

ମୁହଁ ମାଡି ଦେଖ ଅଛନ୍ତି ଶୋଇ ।୧।

ରେଡିଓ ବାଜୁଛି ପାଖରେ ଥାଇ ।

ଜେଜେମା ବସିଛି ଘୋଡେଇ ହୋଇ ।୨।

ନାତି ନାତୁଣୀଙ୍କୁ ଡାକି ଜେଜେମା ।

କହିଲେ ଟୁକୁନା ଶୁଣୁ ପିଙ୍କି ମା ।୩।

ଜେଜେ ଆସିଛନ୍ତି ହାଲିଆ ହୋଇ।

ମୁହଁ ମାଡି ସିଏ ଅଛନ୍ତି ଶୋଇ ।୪।

କୁଦିଦିଅ ତାଙ୍କୁ ଭଲ ଲାଗିବ ।

କହ ଦିହେଁ ଆଗ କିଏ କୁଦିବ ? ୫।

କୁଦିଲେ ଜେଜେଙ୍କ ହାଲିଆ ଯିବ ।

ସୁନାପିଲା କହ କିଏ ହୋଇବ ? ୬।

ଟୁକୁନା କହିଲା ମୁଁ କୁଦିବି ।

ସୁନାପିଲାଟିଏ ମୁଁ ହୋଇବି ।୭।

ପିଙ୍କି ଶୁଣି କହେ ମୁଁ କୁଦିବି ।

ସୁନାପିଲା ଏବେ ମୁଁ ହୋଇବି ।୮।

ଜେଜେମା ଶୁଣି ଖୁସି ହୋଇଲେ ।

ଦିହେଁଯାକ କୁଦ ବୋଲି ବୋଇଲେ। ୯।

ପିଲାଙ୍କର ଖୁସି ଦେଖିବ କିଏ ?

ଜେଜେଙ୍କୁ କୁଦନ୍ତି ଦିହିଁକି ଦିହେଁ ।୧୦।

ଦୁହେଁଯାକ ସୁନାପିଲା ହୋଇବେ ।

ଜେଜେ ଜେଜେମା ଆନନ୍ଦ ହେବେ ।୧୧।