ସିଧାକଥା -104 : ମାଆ

ମରଣ ଆସିବ ଯେଉଁଠି ସେଇଠି ଥାନ କି ଅଥାନ ନାହିଁ,

ସଭିଙ୍କ ଜନମ ଗୋଟିଏ ଜାଗାରେ ମାଆକୋଳ ଏକା ସେହି |

ସଭିଏଁ ଖୋଜିବେ ଆମ ଠାରୁ ଧନ ଦରକାରୀ ସହଯୋଗ,

ମାଆ କେବେ କିଛି ଚାହେନା, କହିବ ମୋର ପୁଅ କରୁ ଭୋଗ |

ସଭିଏଁ ଆମର ଦୋଷ-ତ୍ରୁଟି ଖୋଜି ନେଉଥିବେ ମଜା ହସି,

ମାଆ କେବେ ଦୋଷ ଦେଖି ପାରେ ନାହିଁ ଗୁଣ ଖୋଜୁଥିବ ବସି |

ସଭିଏଁ କହିବେ ବଡ଼ ହେଇଗଲୁ ମୋଟା ଦିଶିଲୁଣି ଏବେ,

ମାଆର ଆଖିକୁ ମୋଟା ଦିଶିବନି ବଡ଼ ଦିଶେ ନାହିଁ କେବେ |

ସଭିଏଁ ଚାହିବେ ଯେଉଁ ମନ ନେଇ ଭିତରେ କପଟ ଥିବ,

ମାଆ ମନସଫା ମମତାରେ ଭରା ସବୁଖୋଲି କହିଦେବ |

ଅସୁସ୍ଥ ହୋଇଲେ ସଭିଏଁ କହିବେ ଡାକ୍ତରଖାନାକୁ ନିଅ,

ଗୁହାରି କରେ ମା' ଠାକୁରାଣୀ ପାଶେ ତାକୁ ଭଲ କରିଦିଅ |

ବାଦ୍ୟ-ଯନ୍ତ୍ର ନେଇ ସୁର-ତାଳ ଦେଇ ସଭିଏଁ ଗାଆନ୍ତି ଗୀତ,

ମାଆର ଅଭୁଲା ଗୁଣୁଗୁଣୁ ସୁର ଉଚ୍ଚାଟ କରେ ମୋ ଚିତ୍ତ |

ଅସହିଷ୍ଣୁ ହୋଇ ସଭିଏଁ ଜଗିବେ ନେବାପାଇଁ ପ୍ରତିଶୋଧ,

କ୍ଷମାମୟୀ ମାଆ ସବୁ ଭୁଲିଯିବ କଲେ ଯେତେ ଅପରାଧ |