ସରଗ ପରୀ ଠୁ ବଳି
ସରଗ ପରୀ ଠୁ ବଳି
ଆଈ ଲୋ, ଏମିତି ଦରପଣ ଧରି
ସଜେଇ ହେଉଛୁ କେତେ ,
ନୂଆ ବୋହୂବେଳେ 'ପରୀ' ଦିଶୁଥିଲୁ-
ଅଜା କହୁଥିଲେ ମୋତେ
ଗାଧୁଆ ତୁଠରେ ବାଟରେ ଘାଟରେ
ହେଉଥିଲା ତୋର ଚର୍ଚ୍ଚା ,
ତୁଳନା କରିକି ଲୋକ କହୁଥିଲେ
ଜହ୍ନ ଠାରୁ ତୁହି ଫର୍ଚ୍ଚା
ଶିଖିଥିଲୁ ଘରୁ ସଣ୍ଠଣା ଯେତେକ
ପାରୁ ନ ଥିଲେ କେ ଖୁଣି ,
ଗାଆଁଟା ଯାକରେ କହୁଥିଲେ ତୋତେ
ସୁନାନାକୀ ବୋହୂରାଣୀ
ହାତେ ଲମ୍ବର ତୁ ଓଢ଼ଣା ଟାଣିକି
ଚାଲୁଥିଲୁ ସବୁବେଳେ ,
କଥା କହୁଥିଲୁ ମାପିଚୁପିକି ଲୋ
ଖୁଣ ନ ଥିଲା ତୋ ତିଳେ
ଗୁରୁଜନେ ଭକ୍ତି ଲଘୁଜନେ ସ୍ନେହ
ପଡ଼ୋଶୀଙ୍କୁ ମଧୁଭାଷ ,
ଅଜାଙ୍କର ମନ ବାନ୍ଧି ରଖିଥିଲୁ
ପକାଇ ତୋ ପ୍ରେମ ଫାଶ
ସେତେବେଳକାର ବେଶଭୁଷା ତୋର
ଉଠୁଥିଲା ପୂରା ଝଳି ,
ଏବେ ବି ଲୋ ଆଈ ରୂପଟି ତୋହର
ସରଗ 'ପରୀ'ଠୁ ବଳି