ସଂପ୍ରୀତିର ମହାମନ୍ତ୍ର
ସଂପ୍ରୀତିର ମହାମନ୍ତ୍ର
ତିନି ଅକ୍ଷରରେ ଏକଇ ଶବଦ
ସଂସାରେ ଗୁରୁତ୍ୱ ବହେ
ସମ୍ପର୍କ ନାମରେ ସମ୍ମୋହନ ବାଣୀ
କାନେ କାନେ ସେତ କହେ l
ଏନ୍ତୁଡ଼ି ନିଆଁରୁ ଜୁଇ ନିଆଁ ଯାଏ
ମଧୁର ସମ୍ପର୍କ ସେତୁ
ଶରୀର ସହିତ ଆତ୍ମାର ସମ୍ପର୍କ
ବିଛିନ୍ନରେ ମହାମୃତ୍ୟୁ l
ମାଟି ଛୁଇଁ ଯେବେ ଜନମ ଲଭିଲି
ସମ୍ପର୍କରେ ଯୋଡ଼ି ହେଲି
ପିତା ମାତା ପୁଣି ବନ୍ଧୁ ପରିଜନେ
ମମତାରେ ବାନ୍ଧି ଦେଲି l
ମାତୃଭୂମିର ମୋ ସସ୍ନେହ ଆହ୍ୱାନେ
ସମ୍ପର୍କକୁ କରି ସୂତ୍ର
ଗଢ଼ିଲି ଜୀବନ ମାଆ ମାଟି ସାଥେ
ଗାଇ ସଂପ୍ରୀତିର ମନ୍ତ୍ର l
ଯୋଡ଼ିଲି ସମ୍ପର୍କ ପରମାତ୍ମା ସାଥେ
ବିଭୁ ପ୍ରେମେ ନେଇ ଦୀକ୍ଷା
ଗୋଟିଏ ସୂତ୍ରରେ କୋଟିଏ ସମ୍ପର୍କ
ଦେଲା ମୋତେ ମହା ଶିକ୍ଷା l
ପରିବେଶ ସାଥେ ସମ୍ପର୍କ ଯୋଡ଼ିଲି
ପ୍ରତ୍ୟାଶିତ ପ୍ରେମେ ଭିଜି
ସୁରକ୍ଷା କବଚ ହୃଦୟରେ ବହି
ମମତାର ମଧୁ ସିଞ୍ଚି l
ମାଆ ସାରଳାଙ୍କ ଆଶିଷ ପସରା
ପ୍ରତି କ୍ଷଣେ ସ୍ମରି ହୃଦେ
ସାରସ୍ୱତ ପଥେ ସମ୍ପର୍କିତ ହେଲି
ବାନ୍ଧିଲି ମୁଁ ଶବ୍ଦେ ଶବ୍ଦେ l
ପରଷି ଦେଲି ମୁଁ ସୃଷ୍ଟିର ସମ୍ଭାର
ପୁଣ୍ୟ ଭୂମି ଏ ଉତ୍କଳେ
ମଧୁର ସମ୍ପର୍କ ଗଢ଼ିଦେଲି ଦମ୍ଭେ
ସାରସ୍ୱତ ସାଥୀ ମେଳେ l
ପଞ୍ଚ ମହାଭୂତେ ଭବ୍ୟ ବନ୍ଧନରେ
ବାନ୍ଧି ହେଲି କାଳକ୍ରମେ
ସର୍ଜିଲି ସମ୍ପର୍କ ସମୟ ସାଥୀରେ
ପ୍ରୀତି ଭରା ଦିବ୍ୟ ପ୍ରେମେ l
ବିଶ୍ୱ ନିୟନ୍ତାଙ୍କ ନିର୍ଣ୍ଣିତ ନିୟମେ
ନିତି ହେଲି ନିମଜ୍ଜିତ
ନିଃଶବ୍ଦେ ନିୟତି ନିର୍ଦ୍ଦାରିତ ନୀତି
ସସମ୍ମାନେ ସମ୍ପର୍କୀତ l
ସ୍ଥାବର ଜଙ୍ଗମ ନର ପଶୁ ପକ୍ଷୀ
ସମସ୍ତଙ୍କୁ ବାଣ୍ଟି ଶ୍ରଦ୍ଧା
ସମ୍ପର୍କର ସୁଦ୍ଧା ପ୍ରାଣ ପ୍ରବାହରେ
ନିତି ହେଉଥିବି ବନ୍ଧା l
ଏତିକି ସମ୍ପର୍କ ଜଗତର ନାଥ
ରଖିଥିବ ମୋ ସାଥୀରେ
ଯେଉଁଠି ବି ଥିଲେ ତୁମ ନାମ ଗାନ
କରୁଥିବି ସଗର୍ବରେ l