ସାରସ୍ୱତ ବିପର୍ଯ୍ୟୟ

ସାହିତ୍ୟ ନାମରେ ଅଣ ସାହିତ୍ୟିକ

କରିଛନ୍ତି ମହାମେଳି

ମୌଳିକତା ଛାଡ଼ି ମାନପତ୍ର କେତେ

ବିକ୍ରି ହୁଏ ଭଳି ଭଳି l

ଶବ ଖାଇବାକୁ ଶାଗୁଣା ଯେସନେ

ଆସିଥାନ୍ତି ଦଳଦଳ

ଶସ୍ତା ସାହିତ୍ୟିକ ସେହି ଅନୁରୂପ

ଖଟାଅନ୍ତି କଳାବଳ l

ସାହିତ୍ୟକୁ ନେଇ ହୀନ ରାଜନୀତି

ଆଦୌ ନୁହେଁ ଶୁଭଙ୍କର

ମାଗି ଆଣିଥିବା ସମ୍ମାନ ସନନ୍ଦ

ନୁହେଁ ପଥ ବିଜୟର l

ଘଟସୂତ୍ର ଭଳି ଖୋଲିଲାଣି ଏବେ

ସାହିତ୍ୟିର କାର୍ଯ୍ୟାଳୟ

ଟଙ୍କା ବିନିମୟେ ସବୁ ଉପଲବ୍ଧ

ସାରସ୍ୱତ ବିପର୍ଯ୍ୟୟ l

ପଦ ପଦବୀର ପରିଚୟ ଦେଇ

ଦଲାଲ ଉଠନ୍ତି ମାତି

ଯୋଗ୍ୟତା ନଥାଇ ମଞ୍ଚରେ ବସନ୍ତି

ପଇସାର କରାମତି l

ଯୋଗ୍ୟତା ସମ୍ପନ୍ନ ପ୍ରଣମ୍ୟ ପ୍ରତିଭା

ମଉଳି ଯାଆନ୍ତି ଆଜି

ମୁକ୍ତି ପାଇବାକୁ ବ୍ୟସ୍ତ ବିବ୍ରତ ସେ

ଉପଯୁକ୍ତ ପଥ ଖୋଜି l

ସଚ୍ଚା ସାହିତ୍ୟିକ ହୁଅ ସଚେତନ

ବାଳୁଙ୍ଗାକୁ ଦିଅ ଫିଙ୍ଗି

ଏ ବଂଶ ମାଡିଲେ ସାରସ୍ୱତ ଧାରା

ଅକାଳେ ପଡ଼ିବ ଭାଙ୍ଗି l

ଲୋକ ଦେଖାଣିଆ ସହଯୋଗ ସାଥେ

ବଢ଼ାଅନ୍ତି ପରିଚୟ

ପ୍ରଚାର ସର୍ବସ୍ବ କ୍ରିୟା ପ୍ରତିକ୍ରିୟା

ସାଙ୍ଘାତିକ ଅଭିନୟ l

ମାନବବାଦର ଭଦ୍ର ମୁଖାତଳେ

ଲୋଲୁପତା ଅଛି ଲୁଚି

ପ୍ରତିବାଦେ ବନ୍ଧୁ ଲେଖନୀ ଚଳାଅ

ରଖି ସାଧନାରେ ରୁଚି l

ଖୋଲିଯିବ ମୁଖା ସମୟ ସାଥୀରେ

ପ୍ରତୀକ୍ଷାର ହେବ ଅନ୍ତ

ସେହିଦିନଟିକୁ କରିଛୁ ଅପେକ୍ଷା

ସାହାହୁଅ ଜଗନ୍ନାଥ l