ସନେଟ- ୪୨

ଦେଖାଅ ସୁପଥ

କବିସୌରଭ ଅନୁପ ସିଂହ ଦେବ

ରାଜା ଖଡ଼ିଆଳ

ପୌର୍ଣ୍ଣମାସୀ ଶଶି ମୁଖେ ନାହିଁ ହାସ୍ୟରେଖା

'କଷଣ' କୁଣିଆ ବେଶେ ଦେଇଅଛି ଦେଖା ।।

ଦୁଃଖଭରା ବାର୍ତ୍ତାଦେଇ ବିଦାରିଛି ହୃଦ

ଚୂର୍ଣ୍ଣୀଭୂତ ପ୍ରଫୁଲ୍ଲିତ ମାନସ-ପ୍ରାସାଦ ।।

ଅଶକୁନ ଲଗ୍ନେ ହୋଇ ଉଦୟ ପୂର୍ଣ୍ଣେନ୍ଦୁ

ଉଦ୍ ବେଳିତ କରିଦିଏ ମୋ ମାନସ-ସିନ୍ଧୁ ।।

ହସେ ନାହିଁ ବୃନ୍ତେ ପୁଷ୍ପ ସରେ କୁମୁଦିନୀ

ବିଷାଦ କୁହେଳି ଛାଏ ମାନସ-ମେଦିନୀ ।।

ଶିରା ପ୍ରଶିରାରେ ଖେଳି ସନ୍ତାପ ଜୁଆର

ସଙ୍କେତ ଦିଏ ଚେତସେ " ହୁଅ ହୁସିଆର " ।।

କ୍ଷମାକର ବିଶ୍ଵମ୍ଭର ତବ ପରିକରେ

ଜଡି ରହିଛି ପରାଣ କଳୁଷ-କୂପରେ ।।

ଆର୍ତ୍ତତ୍ରାଣ ! ଅବିବେକ-ତାମସ ଘୁଞ୍ଚାଅ

ପତିତ ପାନ୍ଥ ଅନୁପେ ସୁପଥ ଦେଖାଅ ।।

ସମାପ୍ତ