ସମୁଦ୍ର ମନ୍ଥନ

ହୋଇ ଦଳବଳ ମେଣ୍ଟ ମନ୍ଥିବେ ମିଶି ସମୁଦ୍ର 

ନିର୍ବାଚନ କମିଶନ ଅଧିକୃତ ସୁମେରୁ ପର୍ବତ

ମହାବିଷ୍ଣୁ ପ୍ରଜାକୁଳ ଧରି କଚ୍ଛପ ସ୍ବରୂପ

ସଂସ୍ଥାପି ମେରୁଖମ୍ଭକୁ ମନ୍ଥନର କଲେ ସୁନିଶ୍ଚିତ ।

ପ୍ରୟୋଗି ବାସୁକୀ ରଜ୍ଜୁ ରକ୍ଷା ପ୍ରଶାସନ ସାଞ୍ଜୁ

ହେଲା ସ୍ଥିର ପ୍ରବନ୍ଧନ ଦୋହନର ବିବିଧ ଚରଣ

ଉଚ୍ଚୈଶ୍ରବା ଐରାବତ ଜାତ ହେଲେ ଲକ୍ଷ୍ମୀମାତ 

ଅପ୍ସରୀ ରମ୍ଭା ମେନକା ରତ୍ନମଣି ଅତି ମୂଲ୍ଯବାନ ।

ବାହନ ଉଚ୍ଚ ଆସନ ଦାବୀ କଲେ ଦେବଗଣ

ଆଦରିଲେ ମହାବିଷ୍ଣୁ ଦେବୀ ଲକ୍ଷ୍ମୀ ଅମୃତ କଳସ

ଦେବତାଙ୍କୁ ବାଣ୍ଟିବାକୁ ଛଳରେ ବିଷ୍ଣୁ ଅମୃତ

ଧରିବାକୁ ହୋଇଥିଲେ ମଧୁମତୀ ମୋହିନୀର ବେଶ ।

ମଦିରା ଭୋଳେ ଦାନବ ରାଗେ ହୋଇ ଗରଗର 

କହିଲେ ନୁହେଁ ସନ୍ତୁଷ୍ଟ ହେଉ ପୁନଃ ଏପରି ମନ୍ଥନ

ବାସୁକୀ ବ୍ଯସ୍ତ ବିବ୍ରତ ନ ସହି ଦୋହନ କଷ୍ଟ 

ହଳାହଳ ଉତ୍କଟକୁ ମୁଖରୁ ତା କରିଲା ବମନ ।

ସମୁଦ୍ର ମନ୍ଥନ ପ୍ରାୟ ମତଦାନ ନିର୍ବାଚନ

ନହେଉ ବାଧ୍ଯବାଧକ ସ୍ବାର୍ଥ ଲାଭ ପଦବୀ କେନ୍ଦ୍ରିକ

ଗଳାବାଟେ ଛଦ୍ମବେଶେ ଅଜର ଅମର ଆଶେ 

ଉପସ୍ଥିତ ଦୁର୍ଜନଙ୍କୁ ଅମୃତରୁ କର ନାଥ ନିଶ୍ଚିତ ବଞ୍ଚିତ ।

ସକଳ ଦେବ ଦାନବ ଜଗତ ଉପାୟଶୂନ୍ୟ

ଦାହେ ହଳାହଳ ଜ୍ଜ୍ବାଳା ପରିବ୍ଯାପ୍ତ ବିଷ ପ୍ରଦୂଷଣ 

ହୁଅନ୍ତୁ ବାରେ ସଦୟ ହେ ଶିବ ମଙ୍ଗଳମୟ

ସତ୍ଯ କର ସଂସ୍ଥାପନ ନୀଳକଣ୍ଠ ବିଷ କର ପାନ ।