ସ୍ମୃତି ପ୍ରଜାପତି (ସନେଟ)

ଶୂନ୍ୟତାରେ ଭରା ହୃଦୟରେ ମୋର ସ୍ନେହ ପ୍ରେମ ଭରିଦେଲ

ମୋର ଅସହାୟ ମନେ ପ୍ରତି ମୁହୁର୍ତ୍ତରେ ଅନୁକମ୍ପା ଭରିଦେଲ

ସଂସାରଟା ଯେବେ ମିଛ ଲାଗୁଥିଲା ତୁମେ ବିଶ୍ୱାସ ବୁଣିଦେଲ

ଶବ୍ଦରେ ପ୍ରକାଶ ପାଇବା ଆଗରୁ ହୃଦୟର ଭାଷା ପଢ଼ିନେଲ

ମୋ ଜୀବନ ରାଜରାସ୍ତାରେ ତୁମେ ଚଲାପଥ ଦେଖାଇଲ

ପ୍ରଶ୍ନବାଚୀ ଭରା କଣ୍ଟକିତ ପଥେ ତୁମେ ଉତ୍ତର ଖୋଜିଦେଲ

ପତ୍ରଝଡା ଦେଲା ଯେବେ ସପନର ବୃକ୍ଷ ଯତନରେ ସାଉଁଟିଲ 

ସପନ ସୋପନେ ମୋର ହାତଧରି ସଫଳତା ଆଣିଦେଲ

ତୁମ ସାଥେ ନୀତି ଚାଲି ଚାଲି ବାଟ ପହଞ୍ଚିଲି ସେକୁଳରେ

ସେକୁଳରେ ଯେବେ ଫେରି ମୁଁ ଚାହିଁଲି ତୁମେ ଥିଲ ବହୁ ଦୂରେ 

ଝାପସା ଝାପସା ଦିଶୁଥିଲା ଏବେ ସ୍ମୃତି ଗ୍ରନ୍ଥର ପ୍ରତି ଫର୍ଦ

ଚେଷ୍ଟା ବି କରିନି ପଢିବାକୁ କେବେ ଗୋଟିଏ ହେଲେ ବି ଶବ୍ଦ

ବଦଳି ଯାଇଛି ଚଲାପଥ ସହ ବର୍ଣ୍ଣମାଳା ଜୀବନର 

ବଦଳି ଯାଇଛି ସମ୍ପର୍କର ଡୋରୀ ବ୍ୟାକରଣ ଜିଇଁବାର