ମୋ ଗାଁ ମନେ ପଡୁଛି

ଆଜି ପୁଣି ମନେ ପଡ଼େ ସେହି ପିଲାଦିନ

ଗାଁ ତୋଟା ପୋଖରୀ ଆଉ ଚଗଲା ପବନ

ସବୁଜ ଶୀତଳ ବନ କୋଇଲିର ତାନ

ସତେ କି ପାଇବି ଫେରି ମୁଁ ସେହି ଜୀବନ !

ଖୋ ଖୋ ଓ କବାଡି ଶବ୍ଦେ କମ୍ପୁଥିବା ଦାଣ୍ଡ

ଗୋଧୂଳି ସମୟ ଆଉ ଲୋକଙ୍କର ରୁଣ୍ଡ

ଟାହି ଟାପରାରେ ପୂର୍ଣ୍ଣ ସେ ପୋଖରୀ କୂଳ

ଭାଉଜ ମାଉସୀଙ୍କର ଜାନି ଯାତେ ମେଳ !

ଲୁଚକାଳି ବୋହୁ ଚୋରି ସେ ଆଚାର ଖିଆ

କି ମଧୁର ଆଈ ମାଁ’ଙ୍କ ସେ କାହାଣୀ କୁହା

ନଡିଆ ଗଛ ଫାଙ୍କରୁ ଉଙ୍କି ମାରା ଚାନ୍ଦ

ବାହା ,ବ୍ରତଘର ପୁଣି ଶିଶୁ କୁଆଁ କାନ୍ଦ !

ମହାଭାରତ ନାଟିକା କିବା ରାମାୟଣ 

ଦଶହରା ଦୀପାବଳୀ ଓ ଦୋଳ ମେଲଣ

ଗାଁ ପୋଖରୀ ମାଛ ଧରା ପୁଣି ଭାଗ ବଣ୍ଟା 

ମନ୍ଦିର ସଂଧ୍ୟା ଆଳତି ସକାଳର ଘଣ୍ଟା। ।

କାଶତଣ୍ଡି ଭରା ବିଲ ଗାଁ ପୋଖରୀ କୁଳ

ଗଙ୍ଗଶିଉଳିର ଗନ୍ଧ ପକ୍ଷୀର କଲ୍ଲୋଳ 

ସତରେ କେଡେ ସୁନ୍ଦର ହଜିଲା ସେ ଦିନ

ଆହା ଫେରି ପାଆନ୍ତି କି ସେ ଦିନ ଜୀବନ !