ତୁମ ଅଙ୍ଗେ ହେବି ଲୀନ

ମୋ ଉପରେ ତୁମେ ଅଶେଷ କରୁଣା

କରିଛ ହେ ପ୍ରିୟତମ ,

ତୁମରି ସହିତ ଯୋଡ଼ିଅଛ ଭାବ

ସେଇ ଅହୋଭାଗ୍ୟ ମମ ।

କେଉଁ ଜନ୍ମେ କିବା ତପ କରିଥିଲି

ଏ ଜନମେ ହେଲ ସଖା ,

ବାରବାର ତୁମ ଭାବେ ବୁଡ଼ିଯାଏ

ଚାହେଁ ପାଇବାକୁ ଦେଖା ।

ନିଇତି ତୁମେ ମୋ ଭାବନାରେ ଆସି

ମନକୁ ମଜ୍ଜାଇ ଦିଅ,

କୋଉଠୁ ଆରମ୍ଭ ହୋଇ ହୁଏ ଶେଷ

ଜାଣି ପାରେନା ତା' ଖିଅ ।

ଶେଷ ହେବ ମୋର ପ୍ରତୀକ୍ଷା-ପରୀକ୍ଷା

ହେବ ଯେବେ ସୁପ୍ରସନ୍ନ ,

ଦୟାବହି ମନମୋହନ ରୂପରେ

ଦେବ ମୋତେ ଦରଶନ ।

କେବେ ସେ ସୁଦିନ ଆସିବ ହେ ଶ୍ୟାମ

ମିଳନ ହୋଇବ ଆମ ,

ଭୁଲିବି ଯେତେକ ସଂସାର ବାସନା

ତୁମ ଅଙ୍ଗେ ହେବି ଲୀନ ।