ବୟସ୍କ ମଣିଷ

ପୁରୁଣା କାଠରେ ଉଈ ଲାଗେନାହିଁ ଔଷଧ ପୁରୁଣା ତେଲ,

ପୁରୁଣା ଦିନର କଥା ଭାବିବାକୁ ଲାଗେ ସମସ୍ତଙ୍କୁ ଭଲ |

ଅଚଳ ପଇସା ଚଳେନାହିଁ ସିନା ମୂଲ୍ୟ ବଢିବଢି ଯାଏ,

ପୁରୁଣା ମୁଦ୍ରାର ଚାହିଦା ଅଧିକ ଖୋଜିଲେ ଦେଉଛି କିଏ ?

ସୁନା-ରୁପା ପୁଣି ବିଭିନ୍ନ ଧାତୁରେ ମୁଦ୍ରା ହେଉଥିଲା ଗଢା,

ତା'ର ମୂଲ୍ୟ କିଏ କଳନା କରିବ ବଜାରରେ ଦର ଚଢା |

ହନୁମାନ ମୁଦ୍ରା ବେପାର ପାଇଁ ତ ହଣାକଟା ଚାଲେ ନିତି, 

ବ୍ୟବହାର ତା'ର ନଜାଣି ନବୁଝି କିଣାବିକା କରୁଛନ୍ତି |

ଅବସର ପରେ ବୟସ୍କ ମଣିଷ ଅଚଳ ପଇସା ହୁଏ,

ଜ୍ଞାନଦୀପ୍ତ ହୋଇ ଅଭିଜ୍ଞତା ଥାଇ ଘରେ ବସି ରହିଥାଏ |

ଚିହ୍ନାରା ଗ୍ରାହକ ଉଚିତ ମର୍ଯ୍ୟାଦା ସମ୍ମାନ ଦିଅନ୍ତି ତାଙ୍କୁ,

ଅନୁଭବ ତାଙ୍କ ଦକ୍ଷତା ବଢାଏ ନୂଆ କାର୍ଯ୍ୟ କରିବାକୁ | 

ଅଲୋଡ଼ା ନୁହନ୍ତି ପୁରୁଣା ମଣିଷ ସେମାନେ ପୁରୁଣା ଘିଅ,

ପଦେକଥା ତାଙ୍କ ଭାଗ୍ୟ ବଦଳାଏ ତାଙ୍କୁ କହିବାକୁ ଦିଅ |

#ସିଧାକଥା