ଏହି ପରା ଆମ ଉତ୍କଳଜନନୀ
ଏହି ପରା ଆମ ଉତ୍କଳଜନନୀ
ଏହି ପରା ଆମ ଉତ୍କଳ ଜନନୀ ଭାରତ ସର କମଳ
ଗଉରବୋଜ୍ଜ୍ୱଳ ଇତିହାସ ଯାର ଭୂଗୋଳ ଚିର ମଞ୍ଜୁଳ
ଚାରୁ ସୁଷମା ଶାଳ, ଯହିଁ କ୍ଷେତ୍ର ରାଜ ନୀଳାଚଳ
ମର୍ତ୍ତ୍ୟ ବୈକୁଣ୍ଠ ଶଙ୍ଖ ମଣ୍ଡଳ |
ପ୍ରକୃତି ରାଣୀର ଶୋଭା ଗନ୍ତାଘର ସର୍ଵ ସମ୍ପଦର ଖଣି
ଭୂଧର ମାଳିନୀ କେଦାର ଶାଳିନୀ ପୁଣ୍ୟତୋୟା ସ୍ରୋତସ୍ୱିନୀ
ଯହିଁ ପରିଲକ୍ଷିତ, ଷଡ଼ ଋତୁଚକ୍ର ସମାବର୍ତ୍ତ
ବୀର ଭୂମି ଖ୍ୟାତ ଆର୍ଯ୍ୟାବର୍ତ୍ତ |
ପୂର୍ବରେ ପୟୋଧି ଯା ପୟର ବନ୍ଦି ମଣଇ ନିଜକୁ ଧନ୍ୟ
ଉପକୂଳାଞ୍ଚଳ ମୃତ୍ତିକା ଉର୍ବର ଶସ୍ୟଦଳେ ପରିପୂର୍ଣ୍ଣ
ଘନ ଜନବସତି, ଚିର ସମ୍ମୁନ୍ନତ ଯା ସଂସ୍କୃତି
ଇତିହାସ ଗାଏ ଯାର କୃତି |
ପରବତ ଘେରା ଅରଣ୍ୟ କୁନ୍ତଳା ଖଣିଜରେ ଭରପୁର
ପଶ୍ଚିମ ଅଞ୍ଚଳ ଶୋଭାର ଭଣ୍ଡାର ନଦ ନଦୀ କଳ କଳ
ଆଦିବାସୀ ବସତି, ଛନ୍ତି ନାନା ଜାତି ଜନଜାତି
ଶାନ୍ତ ସରଳ ଉଦାର ମତି |
ଦେଓମାଳୀ କପିଳାସ ମେଘାସନ ମହେନ୍ଦ୍ର ଗନ୍ଧମାର୍ଦ୍ଦନ
ହୀରାକୁଦ ହୀରାଖଣ୍ଡ କଳାହାଣ୍ଡି ସ୍ବର୍ଣ୍ଣପୁର ମହୀୟାନ
ଶିଳ୍ପ ସମ୍ପଦ ଭରା, ଲୌହ ନଗରୀ ରାଉରକେଲା
ଝାରସୁଗୁଡା ବିମାନ ଖଳା |
ସୁବର୍ଣ୍ଣ ତ୍ରିଭୁଜ ନାନା କ୍ଷେତ୍ରରାଜ ଶିକ୍ଷା ସ୍ୱାସ୍ଥ୍ୟ ନିକେତନ
ଭବନ ଭୁବନ ପଲ୍ଲୀ ଶୋଭାବନ ଗର୍ବ ଗଉରବ ଧନ
ଭାଷା ଭୂଷା ଓଡ଼ିଆ, ଯୁଗେ ଯୁଗେ ହୋଇଛି ବଢ଼ିଆ
ମହାପ୍ରସାଦେ ଗୁଆ ନଡ଼ିଆ |
ଐର ଖାରବେଳ ଯଯାତି କପିଳ ଅନଙ୍ଗ ପୁରୁଷୋତ୍ତମ
ଜୟୀ ଜଗବନ୍ଧୁ ମଧୁ ଗୋପବନ୍ଧୁ ସୁରେନ୍ଦ୍ର ସୁବାସ ସମ
ମହା ବୀରେନ୍ଦ୍ର ଗଣ, ଆଦିକବି କଵି ରବି ଧନ୍ୟ
ଭଞ୍ଜ ରାଧାନାଥ କଵି ପଣ |
ପ୍ରାଚ୍ୟର ହୀରକ ଉତ୍କଳ ମୂଲକ କଳା କାରିଗରୀ ଭୂଇଁ
ଜ୍ଞାନ ବିଜ୍ଞାନର ଅସରା ଅମାର ଜଗତେ ତୁଳନା ନାହିଁ
ବନ୍ଦେ ଉତ୍କଳ ମାତ, ବନ୍ଦେ ଇଷ୍ଟଦେବ ଜଗନ୍ନାଥ
କୀର୍ତ୍ତି କିରୀଟିନୀ ପ୍ରଣିପାତ |