ରାକ୍ଷୀ ରହିଲା ସାକ୍ଷୀ
ରାକ୍ଷୀ ରହିଲା ସାକ୍ଷୀ
ଶ୍ରାବଣ ମାସର ପୂର୍ଣ୍ଣିମା ଦିନଟି
ଅଟଇ ଭାରି ପବିତ୍ର ,
ଭାଇ ହସ୍ତେ ରାକ୍ଷୀ ବାନ୍ଧିବାର ନୀତି
ପାଳନ ହୁଏ ସର୍ବତ୍ର ।
ନୂଆ ଲୁଗା ପିନ୍ଧି ଥାଳିରେ ସଜାଇ
ଭାଇପାଶେ ଭଗ୍ନୀ ଯାଏ ,
ବନ୍ଦାପନା କରି ରାକ୍ଷୀ ବାନ୍ଧିଦେଇ
ମିଠେଇ ଖୁଆଇ ଦିଏ ।
ତା' ବଦଳେ ଭାଇ କିଛି ଟଙ୍କା ଦେଇ
ଭଉଣୀ ମନକୁ ତୋଷେ ,
ଭାଇ ଭଉଣୀଙ୍କ ପବିତ୍ର ବନ୍ଧନ
ରହିଛି ଆମରି ଦେଶେ ।
ଶ୍ରୀକୃଷ୍ଣଙ୍କ ହସ୍ତେ ଦ୍ରଉପଦୀ ଦିନେ
ରାକ୍ଷୀ ବାନ୍ଧି ଦେଇଥିଲେ ,
ଦୁଃଶାସନ ହସ୍ତେ ଉଲଗ୍ନ ସମୟେ
ଶ୍ରୀକୃଷ୍ଣ ସହାୟ ହେଲେ ।
ବଳରାମଙ୍କର ଜନ୍ମଦିନ ବୋଲି
ପୂଜା ହୁଅଇ ଲଙ୍ଗଳ ,
ଗାଈ ବଳଦଙ୍କୁ ହଳଦୀ ଲଗାଇ
ପୂଜିଲେ ହୁଏ ମଙ୍ଗଳ ।
ଗହ୍ମା ଅସୁରର ମୃତ୍ୟୁ ହେଲାବୋଲି
ପିଲାଏ ଗହ୍ମା କରନ୍ତି ,
ତୋରଣେ ଝୁଲାଇ ନାନା ଦ୍ରବ୍ୟମାନ
ଗହ୍ମା ଉପରେ ଡିଅଁନ୍ତି ।
କାଉଡ଼ିଆମାନେ ଶିବଙ୍କ ମସ୍ତକେ
ଜଳାଭିଷେକ କରନ୍ତି ,
ଏହିପରି ନାନା ରୀତିନୀତିମାନ
ଖୁସିରେ ସର୍ବେ ପାଳନ୍ତି ।