ହେମନ୍ତ ହେମାଙ୍ଗିନୀ

କାକର ବୋଝଗୋଟି ପିଠିରେ ବହି

ହେମନ୍ତ ହେମାଙ୍ଗିନୀ ଓହ୍ଲାଏ ମହୀ |

ହିମ ଅଚଳୁ ଆଣେ ହିମ ଅନିଳ

ଶିଶିର ମୁକ୍ତା ଢାଳେ ଅବନୀ ଶିର |

ମଳିନ ହୁଏ ଖରକର କିରଣ

ଶୀତ ସନ୍ତାପେ ଡରି ଦକ୍ଷିଣାୟନ |

କେଦାରେ ପକ୍ୱଧାନ କ୍ଷେତ ଶୋଭନ

ସୁବର୍ଣ୍ଣ ଜିଣି କାନ୍ତି କି ବିମୋହନ |

ଶାରଦା ଅନ୍ନପୂର୍ଣ୍ଣା ଧରଣୀ ପରେ

ବିଜୟ ପୂର୍ଣ୍ଣ କୁମ୍ଭ ଧରି କକ୍ଷରେ |

ଆନନ୍ଦେ ବିହ୍ଵଳିତ ହୁଏ କୃଷକ

ସାଧନା ଫଳ ଲଭି ଯଥା ସାଧକ |

ଅନଳ ଆତପରେ ବଢ଼େ ଆଦର

ଜଳରେ ପଶିବାକୁ ଲାଗିଲା ଡର |

କାର୍ତ୍ତିକ ମାର୍ଗଶିର ଧରମ ମାସ

ସାତ୍ତ୍ୱିକ ସ୍ନାନ ଭୋଜ୍ୟ ବ୍ରତ ଉପାସ |

ଭାଗବତ ପଠନ ଦେବ ଅର୍ଚ୍ଚନ

ପଞ୍ଚୁକ ହବିଷ୍ୟାନ୍ନ ନିଶା ପାଳନ |

ଚଉରା ମୂଳେ ବୃନ୍ଦାବତୀ ପୂଜନ

ଗୃହେ ମନ୍ଦିରେ ଶଙ୍ଖ ଧ୍ଵନି ପାବନ |

ମହାଲକ୍ଷ୍ମୀଙ୍କ ମାଣବସା ପରବ

ସରସୀ ତୁଠେ ପୂଜି ରାଇ ମାଧବ |

ମାସକଯାକ ଆମିଷର ବର୍ଜନ

କରନ୍ତି ସାଧ୍ୟମତେ ପୁଣ୍ୟ ଅର୍ଜନ |

ସ୍ୱାଗତ ହିମ ଋତୁ ସୁଖ ପ୍ରଦାୟୀ

ଅଭାବ କଷଣକୁ ଦିଅ ଏଡ଼ାଇ |