ମଧୁରେ ମଧୁରେ ମୂରଲୀ ବାଜିଲା

ମଧୁରେ ମଧୁରେ ମୂରଲୀ ବାଜିଲା

    କଦମ୍ବ ମୂଳରେ ରହି ରହି

ଛନ୍ଦରେ ଛନ୍ଦରେ ନାଚିଲା ଯମୁନା

   କଳ କଳ ନାଦେ ବହି ବହି |

ପବନେ ପଵନେ ଗଗନେ ଗଗନେ

   ଗଲା ବେଣୁ ସ୍ଵନ ଭାସି ଭାସି

ଚନ୍ଦ୍ରସେଣା ଆଳେ ପଶି ବଳେ ବଳେ 

     ପରଶିଲା ବାର୍ତ୍ତା ହସି ହସି |

ବାଜୁ କର୍ଣ୍ଣପଟ ରାଧା ଛଟପଟ

     ମଦନ ବାଣରେ ଜଳି ଜଳି

ଖଞ୍ଜରେ ଖଞ୍ଜରେ ବାରି ବାହାନାରେ

    ବାରିଜାକ୍ଷୀ ଚଳେ ହଲି ହଲି |

ନିକଟୁ ନିକଟ ହେଉ ସନ୍ନିକଟ

   ଶୁଭିଲା ନୂପୁର ଝୁଣୁ ଝୁଣୁ

ରସିକ ନାଗର କାହ୍ନା ନଟବର

    ଛନଛନ ହେଲେ ଶୁଣୁଶୁଣୁ |

ତରତର ହୋଇ ରାଧା ଆସେ ଧାଇଁ

   କଳସୀ ତୁଠରେ ଥୋଉ ଥୋଉ

ଛପି କଳା ଶଶୀ ଧିରେ ଦେଉ କାଶି

    ଛାତି ତାର ହେଲା ଦାଉଁ ଦାଉଁ |

ଧରି ରାଈ କର ବ୍ରଜ କଳାକର

    କୁଞ୍ଜେ ଘେନିଗଲେ ଚାହୁଁ ଚାହୁଁ

ଅପ୍ରାକୃତ ପ୍ରେମ ରସେ ବିଳସିଲେ

     ମେଘରେ ଦାମିନୀ ଦାଉ ଦାଉ |