ଚିତ୍ର ଚରିତ - 50 କବିତା: ସମସ୍ତଙ୍କୁ ଭଲଲାଗେ : -ଡକ୍ଟର କୃତ୍ତିବାସ ନାୟକ

ସମସ୍ତଙ୍କୁ ଭଲଲାଗେ -ଫୁଲଟିଏ ଫୁଟିଲେ,

ପଶୁହେଉ ପକ୍ଷୀ ହେଉ ଶିଶୁଟିକୁ ଦେଖିଲେ |

ସମସ୍ତଙ୍କୁ ଭଲଲାଗେ ବୁଢା-ବୁଢୀ ହସିଲେ,

ନିଜଲୋକ ଭଦ୍ରଲୋକ ଆସନରେ ବସିଲେ |

ସମସ୍ତଙ୍କୁ ଭଲଲାଗେ ଦେହ ସୁସ୍ଥ ରହିଲେ,

ପର-ଆପଣା ନ ଭାବି ମିଠାକଥା କହିଲେ |

ସମସ୍ତଙ୍କୁ ଭଲଲାଗେ -ଶାନ୍ତ ଶିଷ୍ଟ ସ୍ଵଭାବ,

ଭଲ ବ୍ୟବହାର ପୁଣି ଦୁଃଖୀ ମନ ନଥିବ |

ସମସ୍ତଙ୍କୁ ଭଲଲାଗେ ଗୀତଟିଏ ଶୁଣିଲେ,

ଗୁଣିଲୋକଠାରୁ ନୂଆ ଭଲକଥା ଜାଣିଲେ |

ସମସ୍ତଙ୍କୁ ଭଲଲାଗେ ଋତୁ ମଧ୍ୟେ ବସନ୍ତ,

ଭୋକବେଳେ ଖାଦ୍ୟ ପୁଣି ଶୋଷବେଳେ ସର୍ବତ |

ସମସ୍ତଙ୍କୁ ଭଲଲାଗେ ଥିଲେ ସଫା-ସୁତର,

ପର ଉପକାରେ ଲାଗୁଥିଲେ ମନ ଶରୀର |