ସ୍ମୃତି ଭିଜା ସନ୍ଧ୍ୟାରେ

ମନେ ପଡିଗଲା ତୁମ ଚିହ୍ନା ଚେହେରା

ସ୍ମୃତି ଭିଜା ଏକ ସନ୍ଧ୍ୟାରେ

ଭିଜୁଥିଲେ ଦୁହେଁ ଏକାକୀ ରାସ୍ତାରେ

ଝିପି ଝିପି ବରଷାରେ ।

କଳା ମେଘୁଆ ଆକାଶର ଦିଗବଳୟରେ

ଛୋଟ କପୋତ କପୋତୀ ଭଳି

ଘୁରି ବୁଲୁଥିଲେ ଆନନ୍ଦ ଉଲ୍ଲାସେ

କେତେ ସୁନେଲି ସପନ ବୁଣି ।

ବର୍ଷା ଛିଟାରେ ଦେହ ଭିଜୁଥିଲା 

ମନରେ ଉଷ୍ମତା ତୀବ୍ର କରି

ଅନ୍ଧାର ରାତିରେ ଉଜାଗର ଜହ୍ନ

ଚାହୁଁଥିଲା କଣେଇ କଣେଇ ।

ପାଖା ପାଖି ଥିଲେ ବହୁ ନିକଟତର

ତଥାପି ପାଟି ଥିଲା ଚୁପ୍ ଚାପ୍

ପାଦର ତାଳରେ ବର୍ଷାପାଣି ସୁଅ ଧାର

ଶୁଭୁଥିଲା ଶବ୍ଦ ଟପ୍ ଟପ୍ ।

ସମୟ ତାଳରେ ସମୟ ବିତିଲା

ପାଖେଇ ଆସୁଥିଲା ଘର 

ଆଖ ପାଖ ଭିଡ଼ ଭିତରେ ସତେ

ଘୁରି ବୁଲୁଥିଲା କେତେ ନଜର ।

ସବୁ ନଜରରୁ ନଜର ହଟେଇ

ଆଖି ଖୋଜୁଥିଲା ତୁମକୁ

ପ୍ରେମ ବନ୍ଧନରେ ବାନ୍ଧି ହୋଇ ସାଥୀ

ଭୁଲି ଥିଲେ ନିଜେ ନିଜକୁ ।

ସବୁ ସ୍ମୃତି ଆଜି ଆଖି ପଲକରେ

ଆସେ କାକର ସନ୍ଧ୍ୟାରେ

ତୁମେ ନାହଁ ପାଖେ ବହୁଦୂରେ ଅଛ

ତଥାପି ମନ ଆଜି ବି ତୁମକୁ ଝୁରେ ।