ସମ୍ପର୍କର ସାକ୍ଷୀ ରାକ୍ଷୀ

ଅନା ଲୋ ସଜନୀ ଅନା

ରାକ୍ଷୀ ପୁନେଇଁରେ କାଳିଆ କାହ୍ନା ଯେ

ରାଖୀ ପିନ୍ଧି ମନ କିଣେ ସିନା, ସଜନୀ ଗୋ ।

ନାଲି ହଳଦିଆ ପାଟେ

ରାଖୀ ବନାଇଛି ସୁଭଦ୍ରା ହାତେ ଯେ

ଭାଇ ହାତେ ବାନ୍ଧି ଦେବ ପ୍ରିତେ, ସଜନୀ ଗୋ ।

ନୀଳ ବାଇଗଣୀ ରଙ୍ଗେ

ବଡ ଭାଇ ହସ୍ତେ ବାନ୍ଧିବେ ଆଗେ ସେ

ଜନ୍ମ ଦିନର ଶୁଭେଚ୍ଛା ସଙ୍ଗେ, ସଜନୀ ଗୋ ।

ଶ୍ରାବଣ ପୁର୍ଣ୍ଣିମା ବାର

ଭୋଗ ହେଉଥାଏ ଲଗ୍ନ ମକର ଯେ

ଜନ୍ମି ଥିଲେ ରୋହିଣୀ କୁମର, ସଜନୀ ଗୋ ।

ପାଳିବାକୁ ଜନ୍ମ ଦିନ

ସାରା ଦେଶେ ହୁଏ ରକ୍ଷା ବନ୍ଧନ ଯେ

ଭଗ୍ନୀ ରାଖୀ ବାନ୍ଧି ମାଗେ ମାନ, ସଜନୀ ଗୋ ।

ବିପଦ ଆପଦ ବେଳେ

ଭାତୃ ସାହା ହୋନ୍ତି ଜୀବନ କାଳେ ଯେ

ଦୀର୍ଘ କାମନା କରି ମନରେ, ସଜନୀ ଗୋ ।

ପବିତ୍ର ବନ୍ଧନ ପେଡି

ଖୋଲି ସୁଖ ଭାଇ ଦିଏ ଅଜାଡି ଯେ

ଦୁଃଖ ଦୁର୍ଦ୍ଦଶା ଦିଅନ୍ତି ଫେଡ଼ି, ସଜନୀ ଗୋ ।

ମାନବୀୟ ଲୀଳା ଦେଖ

ମନ୍ଦିରେ ହୁଅନ୍ତି ପଙ୍କଜମୁଖ ଯେ

ଫେଡ଼ି ଭଉଣୀ ସୁଭଦ୍ରା ଦୁଃଖ, ସଜନୀ ଗୋ ।

ଭଉଣୀକୁ ରଖି ପାଶେ

ଲକ୍ଷ୍ମୀଙ୍କୁ ଦୁରେଇ ଦେଲେ ହରଷେ ଯେ

ସେଇ ସମ୍ପର୍କ ଦୁନିଆଁ ଦେଖେ, ସଜନୀ ଗୋ ।

ଅପୂର୍ବ ଏହାର ଶୋଭା

ଶ୍ରୀ ମନ୍ଦିରେ ଭଗ୍ନୀ ଭାଇଙ୍କ ସେବା ଯେ

କୋଟି ପୁଣ୍ୟ ଦର୍ଶନରେ ଅବା, ସଜନୀ ଗୋ ।