ସମ୍ପର୍କର ମଧୁଗୀତି

ସୁନୀଳ ଆକାଶ ଯମୁନା ତରଙ୍ଗ 

ମଳୟ ମୃଦୁ ସମୀର 

ଗାଏ କୁଞ୍ଜବନ ନିନାଦେ ମୂରଲୀ

ପ୍ରୀତି ସ୍ବର ସୁମଧୁର ।

ସବୁଜ ସୁନ୍ଦର କାନନ ନିକୁଞ୍ଜେ

ସୁଧା ପାନେ ମଧୁକର

ଶ୍ଯାମ ତରୁଲତା ସୁମନେ ବିହରି

ଅଧୀର ଚଳ ଚଞ୍ଚଳ ।

ବିତରେ ସୁବାସ କୁସୁମିତ ପୁଷ୍ପ 

ବକୁଳ ଚ୍ୟୁତ ବଲ୍ଲରୀ

ପ୍ରମତ୍ତ ସୃଜନେ ଜଗତ ଜୀବନ 

ପ୍ରେମସୁଧା ଅନୁସରି ।

ସୃଷ୍ଟି ମଧୁଛନ୍ଦେ ନିର୍ଝରେ ଅମୃତ 

ସମ୍ପର୍କର ମଧୁଗୀତି

ଝରେ ସ୍ନେହାଶିଷ ଫଗୁଣର ରଙ୍ଗ 

ସୁସାହିତ୍ଯ ପ୍ରେମପ୍ରୀତି ।

ସରସ ସୁନ୍ଦର ଜୀବନ ଆଦର୍ଶ 

ସୌଜନ୍ଯ ସହାବସ୍ଥାନ 

ସତ୍ଯ ଶୁଭ୍ରାଲୋକେ ଆନନ୍ଦ ଉଲ୍ଲାସେ

ଉଜ୍ଜ୍ବଳୁ ଦିବ୍ଯ ଦର୍ଶନ ।