ସମ୍ପର୍କର ହାତ ଧରି

ସମ୍ପର୍କର ନୂଆ ମୁହଁଟିଏ ଯେବେ

ଆଗକୁ ଆସିଲା ମୋର ।

ସେଇ ମୁହଁକୁ ମୁଁ ଆଦରି ବସିଲି

କରିଲି ତାକୁ ନିଜର ।୧।

ଏତିକି ନିଜର କରି ନେଲି ତାକୁ

ସେ ବି ମଣିଲା ନିଜର ।

ଉଭୟେ ନିଜର ହୋଇଗଲୁ ଯେବେ

ନ ଥିଲା ଆପଣା ପର ।୨।

ଦଣ୍ଡେ ହେଲେ କେହି କାହାକୁ ନ ଛାଡୁ

ନିରନ୍ତର ପରସ୍ପର ।

କାୟ ମନ ବାକ୍ୟ ସମ୍ମିଳିତ ହେଲା

ଭାବନା ଏକ ପ୍ରକାର ।୩।

ସମ୍ପର୍କର ହାତ ଧରି ଚାଲୁଥିଲେ

ଘନଘଟା ହୁଏ ଦୂର ।

ଯେତେ ଝଡ ଝଞ୍ଜା ଜୀବନେ ଆସିଲେ

ନ ଥାଏ ତାକୁ ଖାତର ।୪।

ସମ୍ପର୍କର ହାତ ହୋଇଛି ନିବିଡ

ଖସିବନି ତାହା କେବେ ।

ଏ ଯେଉଁ ସମ୍ପର୍କ ଗଢି ଉଠିଅଛି

ଏ ବୟସେ ମୋର ଏବେ ।୫।

ନିଆରା ସମ୍ପର୍କ ଅଟେ ଏ ଆମର

ସ୍ବାର୍ଥ ରହିତ ଏ ସଦା ।

ଅତୁଟ ରହିବ ସମ୍ପର୍କ ଆମର

ଆସୁ ଯେତେ ବିଘ୍ନ ବାଧା।୬।

ସମ୍ପର୍କର ହାତ ଧରି ଚାଲୁଥିବୁ

ରହିଥିବୁ ଯେତେ ଦିନ ।

ସମ୍ପର୍କର ହାତ ଧରି ଚାଲୁଥିଲେ

ନ ଥିବ ଭବ ବନ୍ଧନ ।୭।

ଆମ ସମ୍ପର୍କର ପରିଚୟ ଆମେ

ସଭିଙ୍କର ହୃଦେ ରହି ।

ସଭିଙ୍କର ଦୁଃଖ ହରଣ କରିବୁ

ଦରଦୀ ବନ୍ଧୁଟେ ହୋଇ ।୮।

ତୁମକୁ କହୁଛି ମୋ ବନ୍ଧୁ ସହିତ

ସମ୍ପର୍କ ସ୍ଥାପନ କରି।

ଚାଲୁଥିବ ଯଦି ଆନନ୍ଦ ଲଭିବ

ସମ୍ପର୍କର ହାତ ଧରି ।୯।