ସମ୍ଭାବନା
ସମ୍ଭାବନା
ପଲ୍ଲବିତ ତରୁଲତା ସବୁଜିମା ଭରିଛି,
ବରଷାର ପ୍ରୀତିଛିଟା ତା ଦେହରେ ବାଜିଛି
ଚାରୁମୟୀ ସୁଷମାରେ ଧରଣୀର ଶରୀର,
ଅଙ୍ଗେ ଅଙ୍ଗେ ଶିହରଣ ପ୍ରୀତିରଙ୍ଗେ ଭିଜିଛି ।
ଇନ୍ଦ୍ରଧନୁ ସପ୍ତରଙ୍ଗ ତା ଉପରେ ଢାଳିଛି,
ଆକାଶର ଆଲିଙ୍ଗନେ ତନୁତାର ମଜ୍ଜିଛି
ନୂତନତ୍ୱ ସୃଷ୍ଟିନେଇ ମନେଆଶା ବାନ୍ଧିଛି,
ଉପହାର ଦେବସିଏ ସଂସାରକୁ ଭାବୁଛି ।
ନିଦାଘର ତପ୍ତତାରେ ହୃଦେଥିଲା ଶୁଷ୍କତା,
ବାରିଧାରା ଢାଳିଦେଲା ଦେହେ ଶୀତଳତା
ମନର ଅଗଣାସାରା ବର୍ଣ୍ଣlଳୀର ସବିତା,
ବିଜୁଳିର ପରଶରେ ହୋଇଗଲା ଦ୍ରବିତା ।
ଆଶାଅଙ୍କୁରିତ ହେଲା ପ୍ରିୟାର ମିଳନେ,
ଗଗନ ବଢାଏ ହାତ ମଧୁ ଆଲିଙ୍ଗନେ
ଦୂରଦିଗବଳୟେ ମିଶି ଏକକାର ମନେ,
ମାତୃରୂପା ସୃଷ୍ଟିକରେ ସୌନ୍ଦର୍ଯ୍ୟର ଦାନେ ।
ବର୍ଣ୍ଣମୟୀ ଚାରୁଶୀଳା ପୃଥିବୀର ତନୁ,
ଆନନ୍ଦେ ଉତଫୁଲ୍ଲିତ ଦେଖି ନଭେ ଭାନୁ
ଆକାଶ ଧରଣୀ ଆଉ ସଲୀଳ ସଂଯୋଗେ,
ହସଇ ପ୍ରକୃତିରାଣୀ ଦୁଃଖଭୁଲି ମନୁ ।
ରିମଝିମ ରିମଝିମ ପାଉଁଜିର ଶବଦେ,
ମେଘକନ୍ୟା ଦେଇଗଲା ଉପହାର ଆନନ୍ଦେ
ଗାଉଛି ବସୁଧାରାଣୀ ତା ଆଗମନୀ ସଂଗୀତେ,
ବର୍ଷା ତା ପ୍ରିୟ ବାନ୍ଧବୀ ତାକୁ ହୃଦୟରୁ ବନ୍ଦେ ।