ସିଧାକଥା ୬

ମାଟି ଆକାଶ ପାଣି ପବନ ଅଗ୍ନିରେ ଗଢ଼ା ଦେହ,

ସେହି ଦେହଟି କହୁଛି ମୋତେ ଆହୁରି କିଛି ଦିଅ ।

ପ୍ରକୃତି ଯାଚି ଦିଏ ପବନ ଅମାପ ମାଟି ପାଣି,

ଖୋଲା ଆକାଶ ସୂର୍ଯ୍ୟ କିରଣ ଦିଏ ମାଟିରେ ବୁଣି ।

ସବୁ ମାଗଣା ମିଳେ ପ୍ରଚୁର ପ୍ରକୃତି କରେ ଦାନ,

ତଥାପି ନିଜେ ମଣୁଛୁ ଆମେ ଗରିବ ଦୀନ-ହୀନ ।

ମାଟି ମୁଠାଏ ମିଳେନା ଏଠି ଚାରା ରୋପିବା ପାଇଁ,

ପାଣି ମୁନ୍ଦାଏ ପିଇବା ପାଇଁ କିଣେ ବଜାର ଯାଇ ।

ପବନ ଏଠି ସାତ ସପନ କୋଠା ହେଇଛି ଠିଆ,

ନୀଳ ଆକାଶ ଦିଶେନା କିନ୍ତୁ ଝରି ପଡୁଛି ନିଆଁ ।

ମାଗଣା ଥିଲା ଜାଳେଣି ଏବେ ଗ୍ୟାସ ହୁଏ କିଣା,

ମାଟି ଝୁଡ଼ିଏ ପଚାଶ ଟଙ୍କା କରୁଛି ବାଟବଣା ।

ସବୁ ତ କିଣା-ବିକାରେ ଚାଲେ ବାହାର ଚକଚକ,

ଭୁଲି ଗଲୁଣି ପ୍ରକୃତି ଦାନ ସମୟର ଏ' ଡାକ ।

#ସିଧାକଥା