ସିଧା କଥା-53 ଦେବଦର୍ଶନ ପରେ

ସଭିଏଁ କହନ୍ତି ମନ୍ଦିରକୁ ଗଲେ ଦେବତା ଦର୍ଶନ ସାରି ,

ଦେବ-ଦେବୀ ପାଶେ ଟିକିଏ ନ ବସି ଯିବନି ଘରକୁ ଫେରି |

କେଉଁଠି ବସିବା କେମିତି ବସିବା କଅଣ ଭାବିବା ମନେ,

ଈଶ୍ଵର ବିଶ୍ଵାସ ଭକ୍ତିଭାବ ଥିବା ମଣିଷ ସେକଥା ଜାଣେ |

ବୁଦ୍ଧି ଜ୍ଞାନ ଆଉ ବିବେକ ଦୃଷ୍ଟିରୁ ମଣିଷ ହିଁ ଶ୍ରେଷ୍ଠଜୀବ,

ଦୟା କ୍ଷମା ଦାନ କରେ ସେ ମଣିଷ ଥାଏ ଯଦି ପ୍ରେମଭାବ |

ଶାସ୍ତ୍ରୀୟ ମତରେ ମନ୍ଦିର ପାଖରେ ବସିବ କିଛି ମୁହୂର୍ତ୍ତ,

ଆଖି ମୁଦିଥିବ ହାତ ଯୋଡ଼ିଥିବ ହେବନାହିଁ ବିଚଳିତ |

ପ୍ରାର୍ଥନା କରିବା-ହେ ପ୍ରଭୁ ଈଶ୍ଵର ! କୃତଜ୍ଞ ତୁମ ପାଖରେ,

ଏତେ ସବୁ ସୁଖ ଦେଇଛ ଜୀବନେ ପୁଣି ନିବେଦନ କରେ |

ମୋତେ ଦିଅ ପ୍ରଭୁ ସୁଖମୃତ୍ୟୁ ଯୋଗ ନିର୍ଭରଶୀଳ ହେବିନି,

ହାତ-ଗୋଡ଼ ମୋର ଚଳମାନ ଥିବ କାହାକୁ କଷ୍ଟ ଦେବିନି |

ମୃତ୍ୟୁପରେ ମୋତେ ତୁମରି ଚରଣେ ରଖିବ ଜଗତ ସାଇଁ,

ସମସ୍ତଙ୍କୁ ସୁଖେ ଆନନ୍ଦରେ ରଖ ମୋର କିଛି ଲୋଡ଼ାନାହିଁ |

ଏତିକି ପ୍ରାର୍ଥନା ଯାଚନା ନିୟମ ଶାସ୍ତ୍ରରେ ନିର୍ଦ୍ଦେଶ ଅଛି,

ଦେବତା ଦର୍ଶନ କରିବା ସମଯେ ମାଗିବାନି ଆଉ କିଛି | |

ଅନ୍ତର୍ଯ୍ୟାମୀ ହୋଇ ଅନ୍ତର ବେଦନା ବୁଝନ୍ତି ଜାଣନ୍ତି ପ୍ରଭୁ,

ମାଗିବା କାହିଁକି ବଳେ ଯାଚିଦେବେ ଆମ କର୍ମଫଳ ସବୁ |