ଶ୍ରୀଫଳ
ଶ୍ରୀଫଳ
ଶ୍ରୀଫଳ ଅଟଇ ଶୁଭର ସଂକେତ
ଲାଗେ ପ୍ରତ୍ୟେକ ପୂଜାରେ
ପୂର୍ଣ୍ଣ କୁମ୍ଭ ଯେବେ ବସା ହେଇଥାଏ
ଖୋଜା ହୁଏ ସିଏ ଆଗରେ ।
ଯେଉଁ କାର୍ଯ୍ୟ କର ଶୁଭ ଅନୁକୂଳେ
ସିଏ ଆଗ ଲୋଡା ହୁଏ
ଶୁଭ ଗୁଆ ଯେବେ କାହାକୁ ଦିଅନ୍ତି
ତାକୁ ଆଗ ଦିଆ ଯାଏ ।
ବିବାହ ବେଳରେ ନିର୍ବନ୍ଧ କାଳରେ
ପ୍ରଥମେ ତାକୁ ନିଅନ୍ତି
ପିତ୍ତଳ ଥାଳିରେ ତାହାକୁ ରଖିଣ
ଲଗନ ପତ୍ର ପଢନ୍ତି ।
ହୋମ କରିଲେ ଶ୍ରୀଫଳ ପୋଡା ଯାଏ
ତାହାକୁ ସର୍ବେ ଖାଆନ୍ତି
ଅଗି ପୂର୍ଣ୍ଣିମାରେ ଅଗ୍ନି ଦେବତାଙ୍କୁ
ପ୍ରଥମେ ଅର୍ପିଣ ଥାନ୍ତି ।
ଏଇ ଶ୍ରୀଫଳକୁ ବ୍ୟବସାୟ କରି
ପରିବାର କେ ପୋଷନ୍ତି
ଶ୍ରୀଫଳ ଗଛକୁ ଲଗେଇଣ କିଏ
ବିକ୍ରି କରିଣ ଚଳନ୍ତି ।
ଶ୍ରୀଫଳରୁ ଖାଦ୍ୟ ପ୍ରସ୍ତୁତ କରିଣ
ଦୋକାନୀ ଯେ ବିକ୍ରି କରେ
ଏଇ ଶ୍ରୀ ଫଳକୁ ଦାସିଆ ବାଉରୀ
ହାତୁ ନେଲେ ପ୍ରଭୁ କରେ ।
ସବୁ ଦେବା ଦେବୀ ହୁଅନ୍ତି ସନ୍ତୁଷ୍ଟ
ଶ୍ରୀଫଳ ଯେବେ ତ ଥାଏ
ଗ୍ରୀଷ୍ମ ସମୟରେ ଶ୍ରୀଫଳ ପାଣୀକୁ
ଖୁସିରେ ଯେ ପିଆଯାଏ ।
ପଣାରେ ଶ୍ରୀଫଳ କୋରିଣ ପକେଇ
ତାହାକୁ ପାନ କରନ୍ତି
ନଡିଆରେ ଭୋଗ ପ୍ରସ୍ତୁତ କରିଣ
ଦେବା ଦେବୀଙ୍କୁ ଅର୍ପନ୍ତି ।
ଶ୍ରୀଫଳରୁ ତେଲ ବାହାର କରନ୍ତି
ସିଏ ବଡ ଉପକାରୀ
ଔଷଧୀୟ ଗୁଣ ରହିଥାଏ ଭଲ
ମୁଣ୍ଡରେ ଲଗାନ୍ତି ନାରୀ ।
ପ୍ରତ୍ୟେକ ପୂଜାର ଭୋଗରେ ସେ ପଡେ
ବଡ ଦରକାରୀ ସିଏ
ତାରିଣୀ ମା'ଙ୍କ ଅତି ପ୍ରିୟ ମା'
ଶ୍ରୀଫଳକୁ ଭଲ ପାଏ ।
ମାଆଙ୍କ ନାଆଁରେ ଶ୍ରୀଫଳକୁ ଯେଉଁ
ଗାଡି ବାଲାକୁ ଦିଅନ୍ତି
ଅତି ଆଗ୍ରହରେ କେତେ ଶରଧାରେ
ଗାଡି ବାଲା ନେଇ ଯାନ୍ତି ।
ଶ୍ରୀଫଳକୁ କେତେ ଭଲ ସେ ପାଆନ୍ତି
କହନ୍ତି ନଡିଆ ରାଣୀ
ତୋ ପାଦେ ପ୍ରଣାମ କରୁଛି ଜନନୀ
ଘଟ ଗାଆଁ ଠାକୁରାଣୀ ।