ସହର କହଇ ଗାଆଁକୁ
ସହର କହଇ ଗାଆଁକୁ
ସହର କହୁଛି ଗାଆଁକୁ ଦେଖେଇ
କେଉଁ ତଳମାଳେ ଅଛୁ
ମଳିମୁଣ୍ଡିଆଙ୍କୁ କୋଳରେ ଧରିଛୁ
ବହପ ତ ଦେଖାଉଛୁ l1l
ପାଣି କାଦୁଅରେ ଅସନା ତୋ ଦେହ
ଅନ୍ଧାରି ମୁଲକେ ରହୁ
ସମକକ୍ଷ କେବେ ହେବୁନି ମୋ ସାଥେ
ମୁହଁ ଟାଣ କଥା କହୁ l2l
ରାତି ଦିନ ସିନା ମୋ ପାଖେ ସମାନ
ମୋ କୋଳେ କ୍ଷମତା ବାଲା
ଆଇନ କାନୁନ ମୋ କୋଳରେ ଗଢ଼ା
ବଡ ବଡୁଆଙ୍କ ମେଳା l3l
ଶାନ୍ତି ପରିବେଶେ ଗାଆଁ ଗଢି ଉଠେ
ଶାନ୍ତ ସ୍ୱଭାବକୁ ନେଇ
ସହରକୁ କୁହେ ଶୁଣ ମୋ ଭଉଣୀ
ଗରବ କାହାକୁ ନେଇ l4l
ଯାହାଙ୍କୁ ଧରିଛୁ ଯଶୋଦା ହୋଇଛୁ
ଜନମି ଥିଲେ ମୋ କୋଳେ
ଜନ୍ମଭୂମି ପ୍ରେମ ଭୁଲି ନାହାନ୍ତି ସେ
ଆସନ୍ତି ପରବ କାଳେ l5l
ମୋହରି ସନ୍ତାନ ମଳିମୁଣ୍ଡିଆ ତ
ତୋ ପେଟକୁ ଦିଏ ଦାନା
ଦାନା ବିନା କିଏ ରହିଛି ସଂସାରେ
ଚାତର କଥା କହନା l6l
ପାଇବୁନି କେବେ ଖୋଲା ପବନ ତୁ
ଚାନ୍ଦର ଜୋଛନା ରାତି
ଖୋଲା ପଡିଆରେ ଗାଇ ଗୋରୁ ଦଳ
ସଞ୍ଜ ବେଳେ ବାହୁଡନ୍ତି l7l
ଦେହ ତୋ ପୁରିଛି ନାଳ ନର୍ଦ୍ଦମାରେ
ବାୟୁ ତୋର ପ୍ରଦୂଷଣ
ପନିପରିବାଠୁ ମାଛ ଶାଗ ଯାଏ
ବାସି ଦ୍ରବ୍ୟେ ତୋ ଜୀବନ l8l
ସବୁ ରୋଗ ହୁଏ ଆଗ ତୋର ଦେହେ
ଜନ ଗହଳିକୁ ନେଇ
ଆଧୁନିକତାର ଚାକଚକ୍ୟ ଭାର
ମୂଳ କାରଣଟି ସେହି l9l
ବୁଝିଲା ସହର ଆଧୁନିକତାର
ପରାଭବ ପରା ଏହି
ଗାଆଁ ପରିବେଶ ମୋ ଠାରୁ ସରସ
ମାନିବାକୁ ଚାରା ନାହିଁ l10l