ଶୀତ ସ୍ମୃତି ଅନୁଭୂତି

ହାଡ଼ ଥରା ଶୀତ ଦେହକୁ ଥରାଏ

ଉଠିବାକୁ ହୁଏ ଡେରି

କମ୍ବଳ ଭିତରେ ରହିବାକୁ ମନ

ସବୁ କାମ ଛାଡ଼ି କରି l

କୋହଲା ପବନ ମାରେ ଥିରି ଥିରି

ଦୋହଲାଏ ଦେହ ମନ

ବରଷା ରାଣୀ ବି ତା' ସାଥେ ମିଶିକି

ଟପକୁଛି ରାତି ଦିନ l

ଖଟା ମିଠା ମିଶା ଶୀତ ଅନୁଭୂତି

ନିଆରା ନିଆରା ଲାଗେ

କୁହୁଡ଼ି ସକାଳେ କଅଁଳ ଖରାରେ

ଅତୀତର ସ୍ମୃତି ଜାଗେ l

କାଠି କୁଟା ପତ୍ର କରି ଏକତ୍ରିତ

ନିଆଁ ପଇଁବାର ମଜା

ସକାଳେ ସଞ୍ଜରେ ଘର ଅଗଣାରେ

ଜେଜେମା' ବାଦାମ ଭଜା l

ଶୀତୁଆ ସକାଳେ ଘର ପିଣ୍ଡା ପରେ

ପଢ଼ୁଥିଲୁ ବସି ନିତି

ସାହିତ୍ୟ ଭୂଗୋଳ ଇତିହାସ ସାଥେ

ଗଣିତ ଆଉ ଜ୍ୟାମିତି l

ସନ୍ଧ୍ୟା ହୋଇଗଲେ ଜେଜେମା'ର କୋଳେ

ଗପ ଶୁଣୁଥିଲୁ ବସି

ବୁଢ଼ୀ ଅସୁରୁଣୀ ପରିଙ୍କ କାହାଣୀ

ଭାଈ ଭଉଣୀଏଁ ମିଶି l

ମୋ ଗାଁର ଶୀତ ସାଥୀ ସାଙ୍ଗ ମିତ

ମୋ ପାଇଁ ଅତୀତ ଆଜି

ଏକାନ୍ତ ବେଳାରେ ମନେ ଉଙ୍କି ମାରେ

ସଜ ଫୁଟା ଫୁଲ ସାଜିଛି ।