ଶୀତ ମାଉସୀ
ଶୀତ ମାଉସୀ
ଶୀତ ମାଉସୀ ଲୋ ଶୀତ ମାଉସୀ।
ଧନକୁ ମୋହର ଦେ' ଆଉଁସି ॥
ଆଉଁସି ଦେ' ତୁ ଧନକୁ ମୋର।
ଅଜାଡ଼ି ଦେ' ତୁ ଆଶିଷ ତୋର ॥
ନହେଲେ ଧନ ମୋ ଯାଉଛି ରୁଷି।
ଶୀତ ମାଉସୀ ଲୋ ଶୀତ ମାଉସୀ ॥
ସୋରିଷ ଫୁଲିଆ ହଳଦି ପାଟ।
ପାଚିଲା ଧାନର ସୁନା-ମୁକୁଟ ॥
ଗେଣ୍ଡୁ ଫୁଲେ ସାଜି ବଉଳ ବେଣୀ।
କୁହୁଡ଼ି ଓଢ଼ଣୀ ଦେଇଛୁ ଟାଣି ॥
ସାଙ୍ଗେ ଆଣିଛୁ କି କାକୁଡ଼ି କଷି ?
ଶୀତ ମାଉସୀ ଲୋ ଶୀତ ମାଉସୀ ॥
ଶିଶିର ବିନ୍ଦୁରେ ଧୋଇବି ପାଦ।
ଖାଇବାକୁ ଦେବି ଲକ୍ଷ୍ମୀ ପ୍ରସାଦ ॥
ପିଇବାକୁ ଦେବି ଆଖୁର ରସ।
ଗୁଡ଼, ଉଖୁଡ଼ାର ଛୁଟିବ ବାସ ॥
ଚାଖିବାକୁ ଦେବି ହୋଇବୁ ଖୁସି।
ଶୀତ ମାଉସୀ ଲୋ ଶୀତ ମାଉସୀ ॥
ରେଜେଇ, କମ୍ବଳ ଦେବି ଘୋଡ଼ାଇ।
ଶୋଇବୁ; ରାତିକୁ ଦେବି ବଢ଼ାଇ॥
ସୂରୁଜ ତେଜକୁ ଦେବି କମାଇ।
ଦେହସୁଖ ପାଇଁ ଦେବି ଉମ୍ହେଇ ॥
ନିଆଁ ଜାଳିଦେବି ପୁଇଁବୁ ବସି।
ଶୀତ ମାଉସୀ ଲୋ ଶୀତ ମାଉସୀ ॥
ସଜ ଫୁଲକୋବି, ତଟକା ଶାଗ।
ସବୁଜ ପରିବା ରଖେ ନୀରୋଗ ॥
ଆଣିବୁ ତୋ ସାଥେ ପରିବା ଝୁଡ଼ି।
ବିବାହ,ବରତେ ଦେବୁ ଅଜାଡ଼ି ॥
ବଣଭୋଜି ଯିବୁ ମୋ ସାଥେ ମିଶି।
ଶୀତ ମାଉସୀ ଲୋ ଶୀତ ମାଉସୀ ॥