Library
ଶେଷଯାତ୍ରା
ଶେଷଯାତ୍ରା
ଜନ୍ମ ସତ୍ୟ
ମରିବା ବି ସତ୍ୟ ।
ଭାଗବତ ବାଣୀ କହେ
ମର୍ତ୍ତ୍ୟ ମଣ୍ଡଳେ ଦେହ ବହି
ଦେବତା ହେଲେ ହେଁ ମରଇ ।
ଜନ୍ମଠାରୁ
ମୃତ୍ଯୁର ଅବଧି
ଜୀବନ ଚକ୍ରରେ
ଏକ ସୋପାନ
ବ୍ୟତିରେକ
କିବା କୁହତ ?
ଏ ଜନ୍ମରୁ ମରଣ
ଜୀବନ ଯାତ୍ରାରେ
ମଣିଷ ବୁଝେ ଯେତିକି
ଅବୁଝା ହୋଇ ରହିଯାଏ
ତା'ଠାରୁ ଢେର୍ ଅଧିକ ।
କିନ୍ତୁ ଏସବୁ ସତ୍ତ୍ୱେ
ସେଇ ମୃତ୍ଯୁ ଆଡକୁ
ତା' ଅଜାଣତରେ
ଦୃତ ଗତିରେ ଧାଏଁ
ଯେଉଁଠିକି ଯିବାକୁ
ସମସ୍ତଙ୍କ ଭିତରେ
ଆହେତୁକ ଭୟ ଥାଏ ।
ମୃତ୍ଯୁ ଧ୍ରୁବ ସତ୍ୟ ଜାଣିବି
ମୃତ୍ଯୁର ଭୟରେ
ଜର୍ଜରିତ ମଣିଷ ଏଠି
ଦୁଷ୍ପ୍ରବୃତ୍ତି , କୁରୀତି,
କୁସଂସ୍କାର ଓ କୁବିଚାର ସହ
ଚରିତ୍ରର ଭ୍ରଷ୍ଟତାରେ
ବୁଡିରହି ନିଜର
ଲକ୍ଷ୍ୟଭ୍ରଷ୍ଟ ଓ
ବିବେକନଷ୍ଟ କରେ ।
ମନରେ ତା'ର ଆସେ ବିଶାଦ
ଭାବନା ହୁଏ ବିକାର ଗ୍ରସ୍ତ
ଆତ୍ମା ହୁଏ ଦିଗହରା ।
ଲମ୍ବା ଆଳସ୍ୟ ଓ ପ୍ରମାଦରେ
ଭରା ଜୀବନ ଅପେକ୍ଷା
ଠିକ୍ କର୍ମରେ, ଜ୍ଞାନରେ
ତଥା ସଦ୍ ବିଚାରରେ ହିଁ
ମନୁଷ୍ଯ ଜୀବନରେ
ପୂର୍ଣ୍ଣତା ଆସିଥାଏ ।
ଭାଗବତରେ ଅଛି ପରା
ପ୍ରାଣୀର ଭଲମନ୍ଦ ବାଣୀ
ମରଣ କାଳେ ତାହା ଜାଣି ।
ମୃତ୍ଯୁ ଭୟର ଉର୍ଦ୍ଧ୍ବକୁ ଉଠି
ନିଜ ସ୍ୱାର୍ଥକୁ ଭୁଲି
ଯଦି ବଞ୍ଚିବା
ନିଜ ଦେଶ ପାଇଁ
ଜାତି ପାଇଁ
ପର ପାଇଁ ।
ଦେଖିବେ ସେ ଜୀବନ
ହୋଇଯିବ ଖୁବ୍ ସହଜ
ଆନନ୍ଦଦାୟକ ସହ
ଭରପୁର୍ ଆତ୍ମତୃପ୍ତିର ।
ଏପରି ବ୍ୟକ୍ତି ବିଶେଷଙ୍କ
ଜୀବନର ଶେଷ ଅଙ୍କ
କଷା ହେବା ପରେ
ଶେଷ ଯାତ୍ରାରେ
ବିଦାୟ ନେବା ବେଳେ
ସମୟର ବାଲିରେ
ଛାଡି ଯଆନ୍ତି
ମହାନ ପଦଚିହ୍ନ ।
***********************
ପ୍ରଶାନ୍ତ କୁମାର ବେହେରା
ଅଧ୍ଯାପକ , ରାଜନୀତି ବିଜ୍ଞାନ ବିଭାଗ,
ସ୍ୱାମୀ ବିବେକାନନ୍ଦ ସ୍ମାରକ ସ୍ୱୟଂଶାସିତ ମହାବିଦ୍ୟାଳୟ,
ଜଗତସିଂହପୁର l
ଦୂରଭାଷ - ୯୪୩୭୧୩୫୯୧୬
