ଶେଷ ପ୍ରଶ୍ନ ?
ଶେଷ ପ୍ରଶ୍ନ ?
ଜୀବନର ଚପଳ ଛନ୍ଦର ମୃଦୁ ମହକରୁ ଉତୁରି
ସବୁଜ ଦିଗନ୍ତ ପାର ହୋଇ ଆସିବାପରେ
ଅପରାହ୍ନ ଦେହ ଓ ମନ କୁ
ଛାଉଣୀ କରି ଦେଲାଣି
ରାତ୍ରୀ କେତେ ବେଳେ
କେଉଁଠି ଆସିଯିବ
ଜଣାନାହିଁ ।
ପ୍ରତି ପାହାଚରେ ଅସରନ୍ତି ପ୍ରଶ୍ନମାନଙ୍କୁ
ଦରାଣ୍ଡି ଦରାଣ୍ଡି
ଉତ୍ତର ପାଇଛି ତ ଅନ୍ୟ ପ୍ରଶ୍ନ ମାନଙ୍କ
ଜାଲରେ ଛନ୍ଦି ହୋଇ ଯାଇଛି ।
ଅବା,
ଉତ୍ତର ଖୋଜି ଖୋଜି ହତାଶ ହୋଇଛି
ହେଲେ, ପ୍ରଶ୍ନମାନେ
କେବେ ପିଛା ଛାଡି ନାହାନ୍ତି ।
ଏ ନଶ୍ଵର ଶରୀର ଏ ସଂସାର
ଛାଡ଼ିବା ପୂର୍ବରୁ
ପ୍ରଶ୍ନ ମୋର ଦୁନିଆକୁ
କହିଦେବ କି ମୋତେ
ଯୁଗ ବଦଳେ ନା ମଣିଷ ବଦଳେ ?
ଏ ନଶ୍ଵର ଶରୀର ଛାଡିବା ପୂର୍ବରୁ
ପ୍ରଶ୍ନ ମୋର ପ୍ରତ୍ୟେକଟି ପିତାମାତାଙ୍କୁ
ସନ୍ତାନ କୁ ସାର୍ଟିଫିକେଟ୍ ଶିକ୍ଷା ଛଡା
ଆମେ ତାଙ୍କୁ ସଂସ୍କାର ଦେଇଛେ କି
ଯାହା ଆମ ଜୀବନର ପୁଣ୍ୟ ପୁଞ୍ଜି ହେବ ?
ଏ ନଶ୍ଵର ଶରୀର ଛାଡିବା ପୂର୍ବରୁ
ଶେଷ ପ୍ରଶ୍ନ ପ୍ରତ୍ୟେକଟି
ସନ୍ତାନ ମାନଙ୍କୁ
ଆମେ ସତରେ କଣ ଆମ ପିତା ମାତାଙ୍କ ପାଇଁ
କର୍ତ୍ତବ୍ୟ କରି ପାରିଛନ୍ତି କି ?
ନଶ୍ଵର ଶରୀର ଛାଡିବା ପୂର୍ବରୁ
ଶେଷ ପ୍ରଶ୍ନ ମଣିଷ ଜାତିକୁ
ଆମେ କଣ ଶ୍ରେଷ୍ଠ ସୃଷ୍ଟି ହିସାବରେ
ଆମ ଶ୍ରେଷ୍ଠତ୍ଵ ପ୍ରତିପାଦନ
କରି ପାରିଛନ୍ତି କି ?
ଶେଷ ପ୍ରଶ୍ନ ସମସ୍ତ ମଣିଷ ଜାତିକୁ ସମ୍ପର୍କର ଚୌହଦୀରୁ-
କେମିତି ଭାଙ୍ଗିଗଲା ସେ
ବୁଝାମଣା ର ସେତୁ ?
ସହଯୋଗର ବାସ୍ନା ମାନେ
କୁଆଡେ ବା ହଜିଗଲେ ?
ସ୍ନେହ ଶ୍ରଦ୍ଧା, ପ୍ରେମର ଅନନ୍ୟ ସଂଜ୍ଞା
ବଦଳିଗଲା କେମିତି ?
ସଂପର୍କର ସୁନ୍ଦର ଅନୁଭବ ଟିକୁ
କିଏ ଠିଆ କରାଇଲା
ସ୍ଵାର୍ଥ ବାରଣ୍ଡାରେ ?