ଶବ୍ଦ ପ୍ରଦୂଷଣ

ନିର୍ଜନ ରାତ୍ରିରେ ଶୂନଶାନ ପଥରେ

ଭୟଙ୍କର ରଡ଼ି ଛାଡ଼ି,

କେଉଁଠି ଶୁଭୁଛି ଆମ୍ବୁଲାନ୍ସ ରଡ଼ି

କେଉଁଠି ମଟର ଗାଡ଼ି |

ରାସ୍ତାକଡ଼ ଘରେ ଜରା ଜୀବନଟି

ହୁଏ ଖାଲି ଛଟପଟ,

ଶବ୍ଦବିଦ୍ଧ କରେ କର୍ଣ୍ଣ ଭେଦ କରି

ଛୁଟିଯିବ କାଳେ ଘଟ |

ଶୂନ୍ୟ ଇଲାକାରେ ଘରଟି ଯାହାର

କି ହୋଇବ ତାର ଦଶା,

ଏପରି ଶବଦ କାନରେ ବାଜିଲେ

ଉଡ଼ିଯିବ ତାର ହଂସା |

ରାସ୍ତା ଯଦି ଅଛି ଶୂନଶାନ ଏଠି

ଶବ୍ଦ କାହିଁପାଇଁ ଲୋଡ଼ା,

ରୋଗୀନେଇ ଗଡ଼ିଯାଏ ଆମ୍ବୁଲାନ୍ସ

ବିକଟାଳ ଶବ୍ଦଭରା |

ଶବ୍ଦ ପାଇଁ ଅବା ନାହିଁ କିଛି ନୀତି

ରାତି ଅଧେ ଆସେ ମାଡ଼ି,

ଅସୁସ୍ଥ ମଣିଷ ବୃଦ୍ଧ ଜରାଗ୍ରସ୍ତ

ଆଖି ନିଦ ଯାଏ ଉଡ଼ି |

ଦୃଷ୍ଟି ଦିଅ ଥରେ ପ୍ରଶାସନ ସ୍ତରେ

ସମସ୍ୟାକୁ ଦୂର କର,

ଅସହାୟ ପ୍ରତି ଦୟା ଭାବ ରଖ

ଅବହେଳାଟି ନକର |