ସବୁ ରଙ୍ଗ ଧୋଇଗଲା ପରେ
ସବୁ ରଙ୍ଗ ଧୋଇଗଲା ପରେ
ଫଗୁଣ ଆସିଲା ଶୁଭ ଲଗନରେ
ରଙ୍ଗର ପସରା ନେଇ ।
ଦୋଳ ବିମାନରେ ଠାକୁର ବୁଲିଲେ
ଅବିରକୁ ବୋଳି ହୋଇ ।୧।
ଦୁଆରେ ଦୁଆରେ ଚଣା ଖଜା ଆମ୍ବ
ଫଳମୂଳ ଭୋଗ ଖାଇ ।
ପ୍ରୀତିର ବାରତା ବୁଣି ଦେଇଗଲେ
ଅବିର ରଙ୍ଗ ଲଗାଇ ।୨।
ଫଗୁ ଦଶମୀରୁ ଚତୁର୍ଦ୍ଦଶୀ ଯାଏଁ
ବୁଲିଲେ ଚାଚେରୀ ଖାଇ ।
ଦୋଳ ପୂର୍ଣ୍ଣମୀରେ ଦୋଳମଣ୍ଡପରେ
ଝୁଲିଲେ ଦୋଳିରେ ଥାଇ ।୩।
ମୁଣ୍ଡେ ବୋଳିହେଲେ ଅବିର ରଙ୍ଗକୁ
ଆସିଲା ତାପରେ ହୋଲି ।
ରଙ୍ଗ ପିଚକାରୀ ମାରିଲେ ସଭିଏଁ
ଦେହ ରଙ୍ଗ ହେଲା ଖାଲି ।୪।
ଘଷି ଘାଷି ହୋଇ ସାବୁନ ଲଗାଇ
ଧୋଇ ଧାଇ ଗଲା ରଙ୍ଗ ।
ମନ ହୃଦୟରେ ଛାପ ଗଲା ଛାଡି
ଖେଳିଲା ଭାବ ତରଙ୍ଗ ।୫।
ଦେହ ରଙ୍ଗ ଥିଲା ଆଗରୁ ଯେପରି
ମନ ହେଲା ରଙ୍ଗାୟିତ ।
ଭାବରେ ଭାବିଲି ସବୁ ଦିନ ତକ
ହୁଅନ୍ତା କି ଦୋଳଯାତ ।୬।
ଦୋଳଗୋବିନ୍ଦଙ୍କ ସାଙ୍ଗରେ ବୁଲନ୍ତି
ତାଙ୍କରି ପାଖରେ ରହି ।
ଏତିକି ଟିକିଏ ସେବା ମୁଁ କରନ୍ତି
ତାଙ୍କ ବିନୋଦନ ପାଇଁ ।୭।
ସବୁ ରଙ୍ଗ ଦେହୁ ଧୋଇଗଲା ମୋର
ସେଥିକି ଭାବନା ନାହିଁ ।
ପ୍ରଭୁଙ୍କର ରଙ୍ଗ ଲାଗୁ ମୋ ଦେହରେ
ଏ ଭାବେ ଭାବିତ ମୁହିଁ ।୮।
ହେ ଦୋଳଗୋବିନ୍ଦ ! ଏ ଅଧମ ଜନେ
ସତେକି ସୁଦୟା ହେବ ।
ଯେଉଁ ଭାବେ ମୋତେ ଭାବିତ କରିବ
ସେ ଭାବେ ମୋ ଦିନ ଯିବ ।୯।