ସ୍ବପ୍ନଦେଖା

ସ୍ବପ୍ନ ଗୋ ତୁମେ    ଚିର ସବୁଜ 

    ସୁନ୍ଦରୀ ପ୍ରେମିକାଟିିଏ

 ଦେଖାଅ କେବେ    ମରୁଝର ତ

       କେବେ ମରୀଚିକାଟିଏ ||

କେବେ ଦେଖାଅ    ଆଶା ଆଲୋକ

     ଶାନ୍ତ କାନ୍ତ ଜହ୍ନଟିଏ

କେବେ ଦେଖାଅ    ଅମା ଅନ୍ଧାରେ

    ମିଞ୍ଜିମିଞ୍ଜି ତାରାଟିଏ||

ଭଲପାଏ ଯେ    ଦେଖିବାକୁ ତୁମ୍ଭେ

     ରାତି ଛୋଟ ହୋଇଯାଏ

ତୁମ ରୂପର      ବୈଭବ ଦେଖୁ

      ଦେଖୁ ରାତି ସରିଯାଏ ||

ଯିଏ ତୁମକୁ       ସାକାର କରି

   ସଫଳ ହେବାକୁ ଚାହେଁ

ଅଧ୍ୟବସାୟ        ନିଷ୍ଠାପରତା

    ସହକାରେ କରିଥାଏ ||•

ସ୍ବପ୍ନ ସାକାର       ପ୍ରଚେଷ୍ଟାରେ ତା

    ଦିନବି ଛୋଟ ହୁଅଇ

 ଦିନ ରାତିକୁ         ଏକ କରିଣ

      ଖଟିବାକୁ ହୁଏ ଭାଇ ||

ଦୃଢ ମନରେ      ସ୍ବପ୍ନ ପଛରେ

    ଭଲପାଇ ଯିଏ ଧାଏଁ

ସ୍ବପ୍ନ ତାହାର    ପୂରା କରିବାରେ

  ଦିନ ଛୋଟ ହୋଇଯାଏ||

ସ୍ବପ୍ନ ଦେଖିବା    ଆରମ୍ଭ କଲେ

   ରାତି ଛୋଟ ମନେ ହୁଏ

ପୂରା କରିବା    ଭଲ ପାଇଲେ

    ଦିନ ଛୋଟ ମନେହୁଏ ||

ସ୍ବପ୍ନ ନାୟିକା       ନିଦ୍ରାରେ ଆସି

     ସୁଖ ଦିଏ କ୍ଷଣ ପାଇଁ

ନିଦ ଭାଙ୍ଗିଲେ      ସତ୍ତା ହରାଇ

     କୁଆଡେ ଯାଏ ଉଭେଇ ||

ସଚେତନରେ    ସ୍ବପ୍ନ ନାୟିକା

     ନିଦକୁ ନିଏ ଚୋରାଇ 

ଦିନର ଶେଷେ   ରାତ୍ରୀ ଆସଇ

    ରଜନୀ ବି ଯାଏ ପାହି ||

ଚକ୍ଷୁ ପଲକ      ପଡେନି ଜମା

     ତା ଦେହରେ ଥାଏ ମତି

ରାତି ଓ ଦିନ     ପ୍ରାପ୍ତି ନିଶାରେ

   ସାଧନାରେ ଯାଏ ବିତି ||

ସ୍ବପ୍ନ ନାୟିକା      ହୁଏ କରାୟତ୍ତ

   କଠୋର ସାଧନା ଶେଷେ

ମନ ପ୍ରାଣକୁ      ଢାଳି ଦିଏ ସେ

    ଲୋଟିକୋଳେ ମଧୁ ହାସେ ||

ଋଷି ବାଲ୍ମିକୀ     ସ୍ବପ୍ନ ବିଳାସେ

   ଦେଖିଲେ ଆଗ୍ନେୟ ଅସ୍ତ୍ର

ଆଜି ବିଜ୍ଞାନୀ     ସେହି ସ୍ବପ୍ନରୁ

    ଗଢେ ଅଗ୍ନି କ୍ଷେପଣାସ୍ତ୍ର ||

ସଚେତନରେ      ଲଙ୍କାପତିଙ୍କ

    ପୁଷ୍ପକ ବିମାନ ସ୍ବପ୍ନ

ଦେଖି ବିଜ୍ଞାନୀ    ଚେଷ୍ଟା କରିଣ

   ଗଢିଅଛି ବ୍ୟୋମଜାନ ||

ସ୍ବପ୍ନ ନାୟିକା      ଅନିନ୍ଦ୍ୟ ରୂୂପସୀ 

     ସ୍ବପ୍ନ ଦେଖ ଚେଇଁକରି

ତାହାର ପଛେ     ପଡି  ଥାଅରେ

    ଦିନ ରାତି ଏକ କରି ||

ଜ୍ଞାନ ବିଜ୍ଞାନ      କ୍ଷେତ୍ରେ ନବୀନ

      ରୂପସୀ ନାୟିକା ସ୍ବପ୍ନ

ଦେଖି ସକଳେ     ପ୍ରଚେଷ୍ଟା ବଳେ

    କର ନୂଆ ଉଦ୍ଭାବନ ||

ଲାବଣ୍ୟବତୀ      ସ୍ବପ୍ନ ନାୟିକା

     ପାଦରେ ପାଦ ମିଶାଇ

ରମ୍ୟ ରସରେ     ଅଦମ୍ୟ ଆବେଗେ

    ନାଚି ଚାଲ ଥେଇ ଥେଇ ||

ସପନ ଦିନେ     ସତ୍ୟ ହୋଇବ

    ସେତିକି ଭଲ ପାଇଲେ

ରଜନୀ କ୍ଷୁଦ୍ର      ଦିବସ କ୍ଷୁଦ୍ର

    ହେଲେ ପାଇବା ନିଶାରେ ||