ଭିଜା ଭିଜା ବରଷା
ଭିଜା ଭିଜା ବରଷା
ଭିଜା ଭିଜା ଏଇ ବରଷା ରାତିରେ,
ତନୁମନ ଖେଳେ ଅଜଣା ତାତିରେ,
ମନ କହେ ଆଜି ଯାଆନ୍ତି ମାତିରେ,
ପ୍ରେୟସୀର ପ୍ରେମ ମହକ ସାଥିରେ।
ହୃଦୟରେ ଉଠେ ଘନ ଶିହରଣ,
କରଥାନ୍ତି ଯଦି ପ୍ରିୟାକୁ ବରଣ,
କିଏ ଅବା କରି ଥାଆନ୍ତା ବାରଣ,
ରଚିବାକୁ ତାର ସାଥେ ରତି ରଣ।
ମଝିରେ ମଝିରେ ମାରୁଛି ବିଜୁଳି,
ବିଜୁଳି ଦିଶୁଛି ମୋର ପ୍ରିୟା ଭଳି,
ଲାଗୁଅଛି ସିଏ ମୋ ସାଥିରେ ଖେଳି,
ବାଦଲର ଉହାଡରେ ଲୁଚକାଳି।
ସପନ ରାଇଜେ ମୁହିଁ ଭାଷି ଭାଷି,
ଆଜି ଏ ରାତିରେ ଭାବେ ବସି ବସି,
ଏମିତି ସେ ମୁଖ ଯାଉଛି ଝଲସି,
ସେହି ରୁପ ବଳୁ ପାରେନାହିଁ ଖସି।
ଅଭିଳାଷା ଏକ ରହିଛି ମନରେ,
ଦେଖନ୍ତିକି ତାକୁ ଏଇ ନୟନରେ,
ବସେଇ ହୃଦୟ ଦେଶ ଆସନରେ,
ଭିଜାଅନ୍ତି ନିତି ପ୍ରେମ ବ୍ୟସନରେ।